എച്ച്.ഐ.വി ബാധിതനെ കൊലപ്പെടുത്തി സഹോദരി
ബെംഗളൂരു: കര്ണാടകയിലെ ചിത്രദുര്ഗയില് എച്ച്ഐവി ബാധിതനായ യുവാവിനെ സഹോദരിയും ഭര്ത്താവും ചേര്ന്ന് കൊലപ്പെടുത്തിയതായി കണ്ടെത്തി. കുടുംബത്തിന് നാണക്കേടുണ്ടാകുമെന്ന ഭീതിയിലാണ് ക്രൂരമായ കൊലപാതകം നടത്തിയത് എന്നാണ് പ്രതികളുടെ മൊഴി.
സംഭവം മനസ്സിലാക്കിയ പിതാവാണ് പൊലീസില് പരാതി നല്കിയത്. തുടര്ന്ന് ഇരുവരെയും പൊലീസ് അറസ്റ്റ് ചെയ്തു.
23 വയസുള്ള മല്ലികാര്ജുനാണ് കൊല്ലപ്പെട്ടത്. ബെംഗളൂരുവിലെ ഒരു സ്വകാര്യ സ്ഥാപനത്തില് ജോലി ചെയ്തിരുന്ന മല്ലികാര്ജുൻ ജൂലൈ 23ന് സുഹൃത്തിനൊപ്പം കുടുംബത്തെ കാണാൻ കാറില് യാത്ര ചെയ്യുന്നതിനിടയില് അപകടത്തില്പ്പെടുകയായിരുന്നു.
അപകടത്തിൽ പരിക്കേറ്റതിനെത്തുടർന്ന് അദ്ദേഹത്തെ ചിത്രദുര്ഗയിലെ ആശുപത്രിയിൽ പ്രവേശിപ്പിച്ചു. ശസ്ത്രക്രിയ ആവശ്യമായ സാഹചര്യത്തില് രക്തപരിശോധന നടത്തിയപ്പോഴാണ് എച്ച്ഐവി പോസിറ്റീവ് ആണെന്ന് സ്ഥിരീകരിച്ചത്.
രക്തസ്രാവം കൂടുതലായതോടെ മല്ലികാര്ജുനെ മറ്റൊരു ആശുപത്രിയിലേക്ക് മാറ്റുകയായിരുന്നു.
ഇതിനുശേഷം സഹോദരി നിഷയും ഭര്ത്താവും ചേര്ന്ന് മല്ലികാര്ജുനെ ബെംഗളൂരുവിലെ ആശുപത്രിയിലേക്ക് കൊണ്ടുപോകാമെന്ന് പറഞ്ഞ് യാത്ര തിരിച്ചു.
എന്നാല്, കുറച്ചു സമയം കഴിഞ്ഞ് സഹോദരന് മരിച്ചതായി പിതാവിനെ അറിയിച്ചു. മകന്റെ അപ്രതീക്ഷിത മരണത്തില് സംശയം പ്രകടിപ്പിച്ച പിതാവ് ചോദ്യം ചെയ്യുകയും തുടര്ന്ന് നിഷ കൊലപാതകത്തിൽ താനും ഭര്ത്താവും ഉള്പ്പെട്ടിരുന്നതായി സമ്മതിക്കുകയും ചെയ്തു.
യാത്രക്കിടെ തന്നെ കാറിനുള്ളില് പുതപ്പ് ഉപയോഗിച്ചാണ് ഇരുവരും ചേർന്ന് മല്ലികാര്ജുനെ ശ്വാസം മുട്ടിച്ച് കൊലപ്പെടുത്തിയത്. മല്ലികാര്ജുന് എച്ച്ഐവി ബാധിതനാണെന്ന വിവരമറിയുന്നത് കുടുംബത്തിന് അപമാനമാകും എന്ന ഭീതിയായിരുന്നു കൊലപാതകത്തിന് പിന്നിലെ കാരണം.
Summary:
Bengaluru: In Chitradurga, Karnataka, a young man infected with HIV was allegedly murdered by his sister and her husband. The accused confessed that they committed the brutal act out of fear that his condition would bring shame to the family.
