കേരളത്തിൽ ഇതുവരെ കണ്ടിട്ടില്ലാത്ത തരത്തിൽ ചൂട് ഉയരുകയാണ്. താപനില അസാധാരണമാം വിധം ഉയരുന്നു. ഇതിനിടെ തൃശൂര് ജില്ലയിലും ഉഷ്ണ തരംഗം സ്ഥിരീകരിച്ചു. പാലക്കാട് ജില്ലക്ക് പുറമെയാണിത്. പാലക്കാട്, തൃശൂര് ജില്ലകളില് ഉയര്ന്ന താപനില സാധാരണയേക്കാള് 5 മുതല് 5.5 ഡിഗ്രി സെല്ഷ്യസിന് മുകളില് രേഖപ്പെടുത്തിയതായി കേന്ദ്ര കാലാവസ്ഥ വകുപ്പ് ഇന്നലെ വൈകുന്നേരം 5.30ന് പുറപ്പെടുവിച്ച താപനില കണക്കുകൽ സൂചിപ്പിക്കുന്നു. അതീവ ജാഗ്രത വേണ്ട സാഹചര്യമാണെന്നും ആളുകൾ ശ്രദ്ധിക്കണമെന്നും മന്ത്രി കെ രാജന് പറഞ്ഞു. സൂര്യാഘാതവും സൂര്യാതപവും ഏല്ക്കാന് സാധ്യത കൂടുതലാണ്. സൂര്യാഘാതം മരണത്തിലേക്ക് വരെ നയിച്ചേക്കാമെന്നും മന്ത്രി പറഞ്ഞു.
പൊതുജനങ്ങള് സ്വയം നിയന്ത്രണം ഏര്പ്പെടുത്തി പരമാവധി പുറത്തിറങ്ങാതെ സുരക്ഷിതരായി ഇരിക്കണമെന്നും വേണ്ട ജാഗ്രത പാലിക്കണമെന്നും കളക്ടര് അറിയിച്ചിട്ടുണ്ട്. പൊലീസ്, ഫയര് ആന്ഡ് റെസ്ക്യൂ, ജില്ലാ മെഡിക്കല് ഓഫീസര്, വിദ്യാഭ്യാസ വകുപ്പ്, തദ്ദേശ സ്വയംഭരണ സ്ഥാപനങ്ങള്, തൊഴില് വകുപ്പ് തുടങ്ങിയവര്ക്കെല്ലാം ജില്ലാ കളക്ടര് ഉഷ്ണതരംഗം നേരിടുന്നതിന് വേണ്ടിയുള്ള നിര്ദ്ദേശങ്ങള് നല്കിയിട്ടുണ്ട്.
പ്രധാന ജാഗ്രതാ നിർദേശങ്ങൾ ഇനിപ്പറയുന്നു:
വീട്ടിലും ഓഫീസിലും തൊഴിലിടത്തിലും വായു സഞ്ചാരം ഉറപ്പാക്കുക.
തൊഴിലുറപ്പ് പ്രവര്ത്തകരും, മാധ്യമപ്രവര്ത്തകരും, പുറം തൊഴിലില് ഏര്പ്പെടുന്നവരും, പോലീസ് ഉദ്യോഗസ്ഥരും 11 am മുതൽ 3 pm വരെ കുടകള് ഉപയോഗിക്കുകയും നേരിട്ട് വെയില് ഏല്ക്കാതിരിക്കാന് ശ്രദ്ധിക്കുകയും ചെയ്യുക.
പകല് സമയത്ത് പുറത്തിറങ്ങുന്നത് പരമാവധി ഒഴിവാക്കുക. അത്യാവശ്യങ്ങള്ക്ക് മാത്രം പുറത്തിറങ്ങുക. പുറത്തിറങ്ങുമ്പോള് നിര്ബന്ധമായും കുടയും പാദരക്ഷയും ഉപയോഗിക്കുക.
ധാരാളമായി വെള്ളം കുടിക്കുക.നിര്ജലീകരണം ഉണ്ടാക്കുന്ന മദ്യം, കാര്ബണേറ്റഡ് പാനീയങ്ങള്, ചായ കാപ്പി എന്നിവ പകല് സമയത്ത് പൂര്ണ്ണമായും ഒഴിവാക്കണം
കായികാദ്ധ്വാനമുള്ള ജോലികളില് ഏര്പ്പെടുന്നവര് ഇടവേളകള് എടുത്തും വിശ്രമിച്ച് കൊണ്ടും മാത്രം ജോലിയില് ഏര്പ്പെടുക.
ശരീരത്തില് നേരിട്ട് വെയിലേല്ക്കുന്ന എല്ലാതരം പുറം ജോലികളും, കായിക വിനോദങ്ങളും, മറ്റ് പ്രവര്ത്തനങ്ങളും പൂര്ണ്ണമായും നിര്ത്തി വെക്കുക.
മാര്ക്കറ്റുകള്, കെട്ടിടങ്ങള്, മാലിന്യശേഖരണ-നിക്ഷേപ കേന്ദ്രങ്ങള് (ഡംപിങ് യാര്ഡ്), ചപ്പ് ചവറുകളും, ഉണങ്ങിയ പുല്ലും ഉള്ള ഇടങ്ങളില് എന്നിവടങ്ങളില് തീപിടുത്ത സാധ്യത കൂടുതലാണ്. ഇവിടങ്ങളില് ഫയര് ഓഡിറ്റ് നടത്തേണ്ടതും കൃത്യമായ സുരക്ഷാ മുന്കരുതല് സ്വീകരിക്കുകയും ചെയ്യേണ്ടതാണ്.
