ഗുരുവായൂരിൽ ഇനി സുഖദർശനം; ഫെയ്സ് ആപ്പ് വഴി ടോക്കൺ
തൃശൂർ: ഗുരുവായൂർ ക്ഷേത്രത്തിൽ ഭക്തർക്ക് ദർശനം കൂടുതൽ സുഗമമാക്കുന്നതിനായി ‘ഫെയ്സ് ആപ്പ്’ സംവിധാനം നടപ്പാക്കാൻ തീരുമാനം. ഈ സംവിധാനത്തിന് മുന്നിൽ നിന്നാൽ ഭക്തർക്ക് ടോക്കൺ ലഭിക്കും.
ടോക്കണിൽ ദർശന സമയം രേഖപ്പെടുത്തിയിരിക്കും. ക്ഷേത്രപരിസരത്തും സമീപപ്രദേശങ്ങളിലുമായി 12 കേന്ദ്രങ്ങളിൽ ഫെയ്സ് ആപ്പ് സിസ്റ്റം സ്ഥാപിക്കാനാണ് പദ്ധതി.
ദർശന സമയമെത്തുന്നതുവരെ പ്രത്യേകമായി ഒരുക്കുന്ന കമ്പാർട്ട്മെന്റുകളിൽ ഭക്തർക്ക് വിശ്രമിക്കാം. ടോക്കൺ നമ്പറുകൾ കമ്പാർട്ട്മെന്റുകളിൽ തെളിയും.
സമയം അടുത്താൽ ടോക്കൺ നമ്പർ അനുസരിച്ച് കമ്പാർട്ട്മെന്റുകളിൽ നിന്ന് ദർശന ക്യൂവിലേക്ക് നീങ്ങുക മതി. ഇതിലൂടെ ക്ഷേത്രം സന്ദർശിക്കുന്നവരുടെ എണ്ണം കൃത്യമായി കണക്കാക്കാനും ആളെ തിരിച്ചറിയാനും സാധിക്കുമെന്ന് അധികൃതർ അറിയിച്ചു.
ഭക്തർ കാത്തിരിക്കുന്ന ഇടങ്ങളിൽ സൗണ്ട് ബോക്സുകൾ സ്ഥാപിച്ച് കുറഞ്ഞ ശബ്ദത്തിൽ ഭക്തിഗാനങ്ങൾ പ്രക്ഷേപണം ചെയ്ത് ഭക്തിപൂർണമായ അന്തരീക്ഷം സൃഷ്ടിക്കാനും തീരുമാനിച്ചിട്ടുണ്ട്.
കാത്തിരിപ്പ് പ്രദേശങ്ങളിൽ ഗുരുവായൂരപ്പന്റെ ചരിത്രം, ഭക്തരുടെ അനുഭവങ്ങൾ എന്നിവ ഉൾപ്പെടുത്തിയ ഡോക്യുമെന്ററികളും പ്രദർശിപ്പിക്കും.
കൂടാതെ ബാത്ത്റൂം സൗകര്യം, മെഡിക്കൽ സഹായം, സ്നാക്സ് കഴിക്കാനുള്ള സൗകര്യം, വാഷ്ബേസ്, പൂജകളും വഴിപാടുകളും ബുക്ക് ചെയ്യാൻ ടച്ച് സ്ക്രീൻ സംവിധാനം തുടങ്ങിയ സൗകര്യങ്ങളും ഒരുക്കും.
വിർച്വൽ റിയാലിറ്റി ഉപയോഗിച്ച് ഡോം തിയേറ്റർ ഒരുക്കാനും പദ്ധതിയുണ്ടെന്ന് ക്ഷേത്രം അഡ്മിനിസ്ട്രേറ്റർ ഒ.വി. അരുണ് കുമാർ വ്യക്തമാക്കി.
ഭക്തർക്ക് സുഗമമായ ദർശനം ഉറപ്പാക്കുന്നതിനുള്ള പ്രധാന നടപടികളിലൊന്നാണ് ഫെയ്സ് ആപ്പ് സംവിധാനമെന്നും ഇത് ഉടൻ നടപ്പാക്കുമെന്നും അഡ്മിനിസ്ട്രേറ്റർ പറഞ്ഞു.
പദ്ധതി നടപ്പാക്കുന്നതിനായി താൽപര്യപത്രം ക്ഷണിച്ചിട്ടുണ്ട്. മികച്ച ആശയങ്ങൾ അവതരിപ്പിക്കുന്ന കമ്പനിക്ക് പദ്ധതി നടത്തിപ്പ് ക്ഷേത്രഭരണ സമിതി ഏൽപ്പിക്കും.
ക്ഷേത്രത്തിൽ വിപുലമായ ക്യൂ കോംപ്ലക്സ് സംവിധാനം നിലവിൽ വരുന്നതുവരെ ഫെയ്സ് ആപ്പ് സംവിധാനം തുടരുമെന്നും അധികൃതർ അറിയിച്ചു.
ENGLISH SUMMARY
Guruvayur Temple has decided to implement a “Face App” token system to make darshan smoother for devotees. Tokens with allotted darshan time will be issued through face recognition at 12 centres around the temple area. Devotees can wait in dedicated compartments and enter the queue as per token numbers. Additional facilities like low-volume devotional music, documentaries, bathrooms, medical support, snacks, wash areas, touch-screen booking for offerings, and a VR dome theatre are also planned. The system will remain until a larger queue complex is completed.
guruvayur-temple-face-app-token-system-darshan
Guruvayur Temple, Thrissur, Face App, token system, darshan, devotees, queue management, temple facilities, VR dome theatre, Kerala news
