കാത്തിരിക്കേണ്ട; സർക്കാർ ആശുപത്രികളിൽ മുതിർന്ന പൗരന്മാർക്ക് ഇനി പ്രത്യേക ഒ.പി കൗണ്ടർ
തിരുവനന്തപുരം: സംസ്ഥാനത്തെ സർക്കാർ ആശുപത്രികളിൽ മുതിർന്ന പൗരന്മാർക്കായി പ്രത്യേക ഒ.പി കൗണ്ടർ ആരംഭിക്കുന്നു. സെപ്റ്റംബർ ഒന്നുമുതലാണ് ഈ സംവിധാനം പ്രാബല്യത്തിൽ വരിക.
താലൂക്ക്, താലൂക്ക് ഹെഡ്ക്വാർട്ടേഴ്സ്, ജില്ലാ, ജനറൽ, സ്പെഷ്യാലിറ്റി ആശുപത്രികൾക്കും മെഡിക്കൽ കോളേജുകൾക്കുമെല്ലാം മുതിർന്ന പൗരന്മാർക്കായി പ്രത്യേക കൗണ്ടറുകൾ ഒരുക്കുമെന്ന് ആരോഗ്യവകുപ്പ് മന്ത്രി വീണാ ജോർജ് അറിയിച്ചു.
സംസ്ഥാനത്തെ പ്രധാന സർക്കാർ ആശുപത്രികളിൽ ഏപ്രിൽ മുതൽ ഓൺലൈൻ ഒ.പി രജിസ്ട്രേഷൻ നടപ്പിലാക്കിയിരുന്നു. വരിനിൽക്കാതെ അപ്പോയിന്റ്മെന്റ് എടുക്കാൻ ക്യു.ആർ കോഡ് സ്കാൻ ചെയ്യാനുള്ള സൗകര്യവും നിലവിലുണ്ട്.
എന്നാൽ ഇ-ഹെൽത്തിലൂടെ ഓൺലൈൻ രജിസ്ട്രേഷൻ ചെയ്യാൻ കഴിയാത്തവരിൽ കൂടുതലും മുതിർന്ന പൗരന്മാരാണെന്ന് കണ്ടെത്തിയതിനാലാണ് പ്രത്യേക കൗണ്ടർ ഒരുക്കാൻ തീരുമാനിച്ചതെന്നും മന്ത്രി കൂട്ടിച്ചേർത്തു.
പെരിയ ഇരട്ടക്കൊലക്കേസ്; നാലാം പ്രതിക്ക് പരോൾ അനുവദിച്ച് സർക്കാർ
കാസർകോട്: പെരിയ ഇരട്ടക്കൊലക്കേസിലെ നാലാം പ്രതി അനിൽകുമാറിന് സർക്കാർ പരോൾ അനുവദിച്ചു. ഒരു മാസത്തേക്കാണ് പ്രതിക്ക് പരോൾ അനുവദിച്ചത്. ബേക്കൽ സ്റ്റേഷൻ പരിധിയിൽ പ്രവേശിക്കരുത് എന്നും നിർദേശമുണ്ട്.
ഏറെ രാഷ്ട്രീയ കോളിളക്കമുണ്ടാക്കിയ കേസായിരുന്നു പെരിയ ഇരട്ടക്കൊലക്കേസ്. 2019 ഫെബ്രുവരി 17നായിരുന്നു കൊലപാതകം നടന്നത്.
കാസർകോട് പെരിയയിൽ യൂത്ത് കോൺഗ്രസ് പ്രവർത്തകരായ കൃപേഷിനേയും ശരത് ലാലിനേയും സിപിഎം പ്രവർത്തകർ വെട്ടിക്കൊലപ്പെടുത്തുകയായിരുന്നു.
ജനുവരിയിൽ കേസിലെ കുറ്റവാളികളായ ഒൻപതു പേരെ ഈ വർഷം കണ്ണൂരിലേയ്ക്ക് മാറ്റിയിരുന്നു. വിയ്യൂർ അതീവ സുരക്ഷാ ജയിലിൽ നിന്നാണ് കണ്ണൂർ സെൻട്രൽ ജയിലിലേക്ക് മാറ്റിയത്.
പ്രതികളായ രജ്ഞിത്ത്, സുധീഷ് ശ്രീരാഗ്, അനിൽ കുമാർ, സജി, അശ്വിൻ, പീതാംബരൻ, സുബീഷ്, സുരേഷ് എന്നിവരെയാണ് ജയിൽ മാറ്റിയത്. കോടതിയുടെ നിർദേശപ്രകാരമാണ് ഇവരെ മാറ്റിയതെന്നായിരുന്നു ജയിൽ അധികൃതരുടെ വിശദീകരണം.
ഒൻപതു പേർക്കും ഇരട്ട ജീവപര്യന്തം സിബിഐ കോടതി ശിക്ഷ വിധിച്ചിരുന്നു. ശിക്ഷിക്കപ്പെട്ട തങ്ങളെ കണ്ണൂർ സെൻട്രൽ ജയിലിലേക്ക് മാറ്റണമെന്ന് പ്രതികൾ തന്നെ ആവശ്യപ്പെട്ടിരുന്നു.
Summary:
Thiruvananthapuram: Special OP counters will be introduced in government hospitals across Kerala exclusively for senior citizens. The new system will come into effect from September 1.
