കാലിഫോർണിയ: ജിമെയിലിലെ എസ്എംഎസ് അധിഷ്ഠിത ലോഗിൻ കോഡ് സംവിധാനം ഗൂഗിൾ അവസാനിപ്പിക്കുന്നതായി റിപ്പോർട്ട്. ലോഗിൻ ചെയ്യാൻ എസ്എംഎസ് വഴി ടു-ഫാക്ടർ ഓതൻറിക്കേഷൻ കോഡ് സ്വീകരിക്കുന്നതിന് പകരം ക്യൂആർ കോഡ് രീതിയിലേക്ക് ജിമെയിൽ മാറുന്നു എന്നാണ് പുറത്തുവരുന്ന വിവരം. അക്കൗണ്ടുകളിലെ സുരക്ഷ വർധിപ്പിക്കുന്നതിൻറെ ഭാഗമായാണ് പുതിയ ലോഗിൻ സംവിധാനം. രാജ്യാന്തര മാധ്യമമായ ഫോബ്സാണ് പുതിയ റിപ്പോർട്ട് പുറത്ത് വിട്ടത്.
എസ്എംഎസ് വഴി ടു-ഫാക്ടർ ഓതൻറിക്കേഷൻ കോഡ് നൽകുന്ന രീതി മാറ്റി, ക്യൂആർ കോഡ് രീതി ജിമെയിലേക്ക് വരുന്ന പുത്തൻ ഫീച്ചർ വരും മാസങ്ങളിൽ തന്നെ ജിമെയിലിൽ ഗൂഗിൾ അവതരിപ്പിക്കുമെന്ന് ഫോബ്സിൻറെ റിപ്പോർട്ടിൽ പറയുന്നു.
ലോഗിൻ ചെയ്യാനായി ആറക്ക കോഡ് നിലവിൽ മൊബൈൽ നമ്പറുകളിലേക്ക് എസ്എംഎസ് വഴിയാണ് യൂസർമാർക്ക് ജിമെയിലിൻറെ ഉടമകളായ ഗൂഗിൾ കമ്പനി അയക്കാറുള്ളത്. ഗൂഗിൾ അക്കൗണ്ടിൽ പ്രവേശിക്കാൻ ശരിയായ പാസ്വേഡ് നൽകിയ ശേഷം ഇത്തരത്തിൽ എസ്എംഎസ് വഴിയുള്ള ആറക്ക കോഡും സമർപ്പിക്കേണ്ടത് ഇപ്പോൾ നിർബന്ധമാണ്. 2011ലാണ് ആദ്യമായി ഗൂഗിൾ ഈ സംവിധാനം അവതരിപ്പിച്ചത്.
ഫോൺ നമ്പറിലേക്ക് എസ്എംഎസ് വഴി ലഭിക്കുന്ന ആറക്ക കോഡ് ഓൺലൈൻ തട്ടിപ്പ് സംഘങ്ങൾ വിദഗ്ധമായി കൈക്കലാക്കാൻ സാധ്യതയുള്ളതിനാലാണ് ടു-ഫാക്ടർ ഓതൻറിക്കേഷനായി ക്യൂആർ കോഡ് രീതി ഗൂഗിൾ പരീക്ഷിക്കുന്നത്. ഗൂഗിൾ അക്കൗണ്ടുകൾക്ക് ക്യൂആർകോഡ് രീതി വരുന്നതോട്കൂടി കൂടുതൽ സുരക്ഷ ഉറപ്പാക്കാനാകുമെന്നാണ് കമ്പനി വിചാരിക്കുന്നത്. ഭാവിയിൽ സ്മാർട്ട്ഫോൺ ക്യാമറകൾ വഴി ക്യൂആർ കോഡ് സ്കാൻ ചെയ്യുന്ന രീതി ജിമെയിലേക്ക് കൊണ്ടുവരാനാണ് ഗൂഗിൾ ആലോചിക്കുന്നത്.
