കോഴിക്കോട്ട് പെണ്കുട്ടികളെ ഹോസ്റ്റലില് നിന്ന് ഇറക്കിവിട്ടെന്ന് പരാതി
കോഴിക്കോട്: ഹോസ്റ്റലില് താമസിക്കുന്ന പെണ്കുട്ടികളെ മുന്നറിയിപ്പില്ലാതെ ഇറക്കിവിട്ടതായി പരാതി. കോഴിക്കോട് ചാലപ്പുറത്താണ് സംഭവം.
ചൊവ്വാഴ്ച രാവിലെ പെണ്കുട്ടികള് ഓഫീസിലേക്കും കോളേജിലേക്കും പോയ സമയത്താണ് വീട്ടുടമ വീടുപൂട്ടിപ്പോയതെന്ന് പെണ്കുട്ടികള് ആരോപിച്ചു.
വീട്ടുടമയുടെ കൈയില് നിന്ന് ഒരാള് വാടകയ്ക്കെടുക്കുകയും അയാളുടെ കൈയില് നിന്ന് മറ്റൊരു യുവതി ഹോസ്റ്റല് നടത്താന് വാടകയ്ക്കെടുക്കുകയും ചെയ്തതാണ് ഈ വീടെന്നും കസബ പോലീസ് അറിയിച്ചു.
ഈ യുവതി കുട്ടികളെ പറഞ്ഞുപറ്റിക്കുകയായിരുന്നെന്നാണ് അന്വേഷണത്തില് വ്യക്തമായതെന്നും കസബ പോലീസ് വ്യക്തമാക്കി.
ഇറക്കിവിട്ടതിനെ തുടർന്ന് ചൊവ്വാഴ്ച രാത്രി കാളൂര് റോഡിലുള്ള ഒരു ഹോസ്റ്റലില് താത്കാലികമായാണ് ഇവര് താമസിച്ചത്.
വസ്ത്രങ്ങള് ഉൾപ്പെടെ വീട്ടിനുള്ളിലായതിനാല് തന്നെ ബുധനാഴ്ച രാത്രി പോലീസെത്തി വീടുതുറന്നുകൊടുക്കുന്നതുവരെ വസ്ത്രംമാറ്റാന് സാധിച്ചില്ലെന്നും പെണ്കുട്ടികള് പറയുന്നു.
ഹോസ്റ്റല് നടത്തിയ സ്ത്രീയെ ഫോണിൽ ബന്ധപ്പെടാന് ശ്രമിച്ചെങ്കിലും അതിന് സാധിച്ചിട്ടില്ലെന്നും അവര് പറഞ്ഞു.
പെണ്കുട്ടികളുടെ വസ്ത്രങ്ങളും മറ്റുസാധനങ്ങളുമെല്ലാം വീട്ടിനുള്ളിലായതിനാല് തന്നെ അതെടുക്കണമെന്നാവശ്യപ്പെട്ട് പെണ്കുട്ടികള് കസബ പോലീസ് സ്റ്റേഷനില് എത്തിയിരുന്നു.
തുടര്ന്ന് ബുധനാഴ്ച രാത്രിയോടെ കസബ പോലീസെത്തി വീട് തുറന്നുകൊടുത്തതോടെയാണ് ഇവർക്ക് സാധനങ്ങളെടുക്കാന് സാധിച്ചത്.
കൃത്യമായി വാടകനല്കിയിരുന്നെന്നും ഹോസ്റ്റല് നടത്തിയിരുന്ന യുവതി തങ്ങളോട് കാര്യങ്ങളൊന്നും പറഞ്ഞിരുന്നില്ലെന്നും പെണ്കുട്ടികള് ആരോപിച്ചു.
സിബിഎസ്ഇ പത്ത്, പന്ത്രണ്ട് ക്ലാസുകളിലെ പരീക്ഷാ തീയതി പ്രഖ്യാപിച്ചു
ന്യൂഡല്ഹി: 2026ലെ സിബിഎസ്ഇ പത്താം ക്ലാസ്, പന്ത്രണ്ടാം ക്ലാസ് പരീക്ഷ തീയതികള് പ്രഖ്യാപിച്ചു. പരീക്ഷകള് തുടങ്ങുന്നതിന് അഞ്ച് മാസം മുന്പാണ് ടൈം ടേബിള് പ്രഖ്യാപിച്ചിരിക്കുന്നത്.
സിബിഎസ്ഇ പത്താം ക്ലാസ് പരീക്ഷ 2026 ഫെബ്രുവരി 17 ചൊവ്വാഴ്ച ആരംഭിക്കും. മാര്ച്ച് 18-ന് ആണ് പരീക്ഷ അവസാനിക്കുക. പന്ത്രണ്ടാം ക്ലാസ് 2026 ഫെബ്രുവരി 17-ന് ആരംഭിച്ച് ഏപ്രില് 4-നും അവസാനിക്കും.
പത്ത്, പന്ത്രണ്ട് ക്ലാസ്സുകളിലെ പരീക്ഷകള് രാവിലെ 10:30-ന് ആരംഭിച്ച് ഒറ്റ ഷിഫ്റ്റില് മാത്രമായിരിക്കും നടത്തുകയെന്ന് ബോര്ഡ് അറിയിച്ചു.
അതേസമയം ആവശ്യമെങ്കില് പരീക്ഷയുടെ ഷെഡ്യൂളില് മാറ്റം വരുത്താന് സാധ്യതയുണ്ടെന്നും സിബിഎസ്ഇ വ്യക്തമാക്കി.
പത്താം ക്ലാസ് പരീക്ഷ ഫെബ്രുവരി 17ന് ആരംഭിക്കും. കണക്ക് ആയിരിക്കും ആദ്യത്തെ പരീക്ഷ. തുടർന്ന് മാർച്ച് 19ന് ഭാഷാ പേപ്പറോടെ പത്താം ക്ലാസ് പരീക്ഷ അവസാനിക്കും.
12-ാം ക്ലാസ് പരീക്ഷകളും ഫെബ്രുവരി 17ന് ആരംഭിക്കും. ഏപ്രിൽ 4നായിരിക്കും 12-ാം ക്ലാസ് പരീക്ഷകൾ അവസാനിക്കുന്നത്.
10, 12 ക്ലാസുകളിലെ വിദ്യാർഥികൾക്കുള്ള മെയിൻ പരീക്ഷ, 12-ാം ക്ലാസ് കായിക വിദ്യാർഥികൾക്കുള്ള പരീക്ഷ, 10-ാം ക്ലാസ് വിദ്യാർഥികൾക്കുള്ള സെക്കൻഡ് ബോർഡ് പരീക്ഷ, 12-ാം ക്ലാസ് വിദ്യാർഥികൾക്കുള്ള സപ്ലിമെന്ററി പരീക്ഷ എന്നിവയാണ് ഇക്കാലയളവിൽ നടത്തുക.
പരീക്ഷ പൂർത്തിയായി പന്ത്രണ്ട് ദിവസങ്ങൾക്ക് ശേഷം ഉത്തരക്കടലാസുകളുടെ മൂല്യനിർണയം ആരംഭിക്കുമെന്നും അധികൃതർ അറിയിച്ചു.
204 വിഷയങ്ങളിലായി ഏകദേശം 45 ലക്ഷം വിദ്യാർഥികളാണ് പരീക്ഷയ്ക്ക് തയ്യാറെടുക്കുന്നത്.
Summary: Complaint filed in Kozhikode Chalappuram alleging that girls staying in a hostel were evicted without prior notice. Parents and students have raised concerns over the sudden action.
