സോഷ്യൽ മീഡിയയിൽ അശ്ലീല കമന്റുകളിട്ടതിന് ഒരു യുവാവിനെ യുവതി പൊതിരെ തല്ലുന്ന വീഡിയോ ഇപ്പോൾ സോഷ്യൽ മീഡിയയിൽ ചർച്ചയാവുകയാണ്. ഉത്തർ പ്രദേശിലെ ഉന്നാവോ കോടതി പരിസരത്ത് വച്ചാണ് യുവതി യുവാവിനെ മർദ്ദിക്കുന്നത്. (Frequent obscene comments on social media; The young woman kicked the young man in the court premises)
സംഭവം ഇങ്ങനെ:
യുവാവ് യുവതിയേയും അവരുടെ കുടുംബാംഗങ്ങളെയും കുറിച്ച് കുറച്ച് ദിവസങ്ങളായി മോശം കമന്റുകൾ തുടർച്ചയായി ഫേസ്ബുക്കിൽ എഴുതുന്നുണ്ടത്രെ. ഇതാണ് യുവതിയെ അതിക്രമത്തിന് പ്രേരിപ്പിച്ചത്.
‘ഇത്തരം കമന്റുകൾ ഫേസ്ബുക്കിലിടാൻ നിനക്കെങ്ങനെ ധൈര്യം വന്നു, എന്റെ സ്വഭാവത്തെ കുറിച്ച് നീയെന്താണ് പറഞ്ഞത്’ തുടങ്ങിയ ചോദ്യങ്ങളും തല്ലുന്നതിനിടയിൽ യുവതി യുവാവിനോട് ചോദിക്കുന്നുണ്ട്. ഇതിനിടെ യുവതി യുവാവിനെ ചവിട്ടുന്നതിൻ കഴുത്തിൽ കയറി നിൽക്കുന്നതും കാണാം.
അതിനിടെ ഒരു പുരുഷനും യുവാവിനെ തല്ലാനൊരുങ്ങുന്നുണ്ടെങ്കിലും യുവതി അത് തടയുകയാണ്. ആദ്യം യുവാവിനെ ഒരു ഷോപ്പിൽ വച്ചാണ് മർദ്ദിച്ചതെന്നും പിന്നീട് കോടതി പരിസരത്തേക്ക് കൊണ്ടുവന്ന് അവിടെ വച്ചും മർദ്ദിക്കുകയായിരുന്നു എന്നും റിപ്പോർട്ടുകൾ പറയുന്നു.
നിരവധിപ്പേർ സമീപത്ത് കൂടി നിൽക്കുന്നുണ്ട്. അതേസമയം കോടതി പരിസരമായിരുന്നിട്ടും ഒരു പൊലീസുകാരൻ പോലും സംഭവത്തിൽ ഇടപെട്ടില്ല എന്നും റിപ്പോർട്ടുകളുണ്ട്. യുവതിയുടെ ഭർത്താവും മറ്റും ഇടപെട്ടതിനെ തുടർന്നാണ് യുവതി അക്രമം അവസാനിപ്പിച്ചത് എന്നും പറയുന്നു.
