സാമ്പത്തിക ബാധ്യത; പഞ്ചായത്ത് മുൻ വൈസ് പ്രസിഡന്റ് ആത്മഹത്യ ചെയ്തു
പാലക്കാട്: സാമ്പത്തിക ബാധ്യതയെ തുടർന്ന് അഗളി പഞ്ചായത്ത് മുൻ വൈസ് പ്രസിഡന്റായ ഗോപാലകൃഷ്ണൻ (60) ആത്മഹത്യ ചെയ്തു. അഗളി പഞ്ചായത്ത് പുലിയറ വണ്ടർകുന്നേൽ സ്വദേശിയാണ് മരിച്ച ഗോപാലകൃഷ്ണൻ.
സഹകരണ ബാങ്കിൽ ഏകദേശം എട്ട് ലക്ഷം രൂപയുടെ കടബാധ്യത ഉണ്ടായിരുന്നുവെന്നും, ഇതിനെ തുടർന്ന് ഭൂമിക്ക് ജപ്തി ഭീഷണി നേരിട്ടിരുന്നുവെന്നുമാണ് വിവരം.
തണ്ടപ്പേർ ലഭിക്കാത്തതിനാൽ വസ്തു വിൽക്കാനും കഴിയാതെ വന്നത് ഗോപാലകൃഷ്ണനെ കൂടുതൽ മാനസിക സമ്മർദ്ദത്തിലാക്കിയതായി പറയുന്നു.
ഇതിനിടയിൽ ആരോഗ്യപ്രശ്നങ്ങളും അദ്ദേഹത്തെ ബാധിച്ചു. ഈ സാഹചര്യങ്ങളാണ് ആത്മഹത്യയിലേക്ക് നയിച്ചതെന്നാണ് പ്രാഥമിക നിഗമനം.
വാടകവീട്ടിൽ വെച്ച് കൃഷിയിടത്തിൽ ഉപയോഗിക്കുന്ന കീടനാശിനി കഴിച്ചാണ് ആത്മഹത്യ ശ്രമം നടത്തിയതെന്നാണ് വിവരം. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
സിപിഎം നേതാവായിരുന്ന ഗോപാലകൃഷ്ണൻ 2004–05 കാലഘട്ടത്തിൽ അഗളി പഞ്ചായത്ത് വൈസ് പ്രസിഡന്റായും 2005–10 കാലയളവിൽ പഞ്ചായത്തംഗമായും പ്രവർത്തിച്ചിട്ടുണ്ട്.
(ശ്രദ്ധിക്കുക: ആത്മഹത്യ ഒരിക്കലും പരിഹാരമല്ല. മാനസികാരോഗ്യ വിദഗ്ധരുടെ സഹായം തേടുക. ഹെൽപ്ലൈൻ നമ്പറുകൾ: 1056, 0471-2552056)
English Summary
A former vice president of Agali Panchayat in Palakkad, Gopalakrishnan (60), died by suicide allegedly due to financial distress. He reportedly had a loan of Rs 8 lakh from a cooperative bank and was facing threats of land seizure. Health issues and inability to sell property due to documentation problems added to the stress. He was rushed to the hospital after the incident but could not be saved. An investigation is underway.
former-agali-panchayat-vice-president-suicide-over-financial-distress
Palakkad news, Agali panchayat, former vice president, financial distress, suicide case, Kerala politics, cooperative bank loan, mental health awareness
