മലപ്പുറത്ത് ‘പതമഴ’; നാട്ടുകാർ ആശങ്കയിൽ
മലപ്പുറം: കൊടുംചൂടിനിടയിൽ മലപ്പുറം തിരുനാവായ മേഖലയിലെ ജനങ്ങളെ അമ്പരപ്പിച്ച് അപൂർവമായ ‘പതമഴ’.
ശനിയാഴ്ച വൈകുന്നേരം ജില്ലയിലെ വിവിധ ഭാഗങ്ങളിൽ കനത്ത മഴ ലഭിച്ചതിന് പിന്നാലെ, ഇന്നലെ താനൂർ കൈത്തക്കര, കുത്തുകല്ല് പ്രദേശങ്ങളിൽ പെയ്ത വേനൽമഴയോടൊപ്പം അസാധാരണമായി വെളുത്ത പത പ്രത്യക്ഷപ്പെട്ടു.
ടെറസുകളിൽ നിന്നൊഴുകിയ മഴവെള്ളത്തിൽ പഞ്ഞി വിതറിയതുപോലെ പത അടിഞ്ഞുകൂടിയതായി നാട്ടുകാർ പറഞ്ഞു.
ഇതുവരെ പ്രദേശത്ത് ഇത്തരമൊരു പ്രതിഭാസം കണ്ടിട്ടില്ലെന്നും, മഴ മാറിയതോടെ പത അപ്രത്യക്ഷമായെങ്കിലും ഇതിന് പിന്നിലെ ശാസ്ത്രീയ കാരണം വ്യക്തമല്ലാത്തത് ആശങ്കയുണ്ടാക്കുന്നതായും അവർ വ്യക്തമാക്കി.
അന്തരീക്ഷത്തിലെ പൊടിപടലങ്ങളോ ചില രാസവസ്തുക്കളോ മഴവെള്ളവുമായി കലർന്നാൽ ഇത്തരത്തിൽ പത രൂപപ്പെടാൻ സാധ്യതയുണ്ടെന്നാണ് പ്രാഥമിക വിലയിരുത്തൽ.
പ്രത്യേക കാലാവസ്ഥാ സാഹചര്യങ്ങളിൽ മരങ്ങളുടെ ഇലകളിൽ നിന്നുള്ള ഘടകങ്ങൾ മഴത്തുള്ളികളോടൊപ്പം പതയായി താഴേക്ക് പതിക്കാനും സാധ്യതയുണ്ടെന്ന് കാലാവസ്ഥാ വിദഗ്ധർ വിശദീകരിച്ചു.
സമീപപ്രദേശങ്ങളിലെ വ്യവസായശാലകളിൽ നിന്നുള്ള ഘടകങ്ങൾ അന്തരീക്ഷത്തിൽ കലരുന്ന സാഹചര്യങ്ങളിൽ ‘ഫോം റെയിൻ’ എന്നറിയപ്പെടുന്ന പതമഴ പ്രത്യക്ഷപ്പെടുന്നത് അപൂർവമല്ലെന്നും, അതിനാൽ അമിത ആശങ്ക വേണ്ടെന്നും വിദഗ്ധർ അറിയിച്ചു.
English Summary
Residents in Tirunavaya area of Malappuram were surprised after a rare ‘foam rain’ was witnessed during summer showers. White foam-like particles were seen floating with rainwater in nearby localities. Experts say such formations can occur when dust or chemical particles mix with rainwater under specific atmospheric conditions and there is no need for public concern.
foam-rain-reported-in-tirunavaya-malappuram
malappuram news, tirunavaya, foam rain, padamazha, unusual rainfall, kerala weather, summer rain, climate news
