കോഴിക്കോട്: ആൾമറയില്ലാത്ത കിണറ്റിൽ വീണ് അഞ്ചുവയസുകാരൻ മരിച്ചു. കോഴിക്കോട് വടകര മണിയൂർ കരുവഞ്ചേരിയിലാണ് സംഭവം. വീടിനടുത്ത് പറമ്പിൽ കളിച്ചു കൊണ്ടിരിക്കെയാണ് അപകടമുണ്ടായത്.
കരുവഞ്ചേരിയിലെ നിവാൻ (5) ആണ് മരിച്ചത്. നിവാനോടൊപ്പം മറ്റൊരു കുട്ടിയും കിണറ്റിൽ വീണെങ്കിലും അത്ഭുതകരമായി രക്ഷപ്പെട്ടു. കിണറ്റിലെ കൽപ്പടവുകളിൽ പിടിച്ചു നിന്നതിനാലാണ് ഈ കുട്ടി രക്ഷപ്പെട്ടത്.
എന്നാൽ നിവാൻ വെള്ളത്തിലേക്ക് വീണുപോവുകയായിരുന്നു. ഇന്ന് വൈകിട്ട് നാലരയോടെയായിരുന്നു സംഭവം. അഗ്നി രക്ഷ സേന സ്ഥലത്തെത്തിയെങ്കിലും നാട്ടുകാർ കുട്ടികളെ പുറത്തെടുത്തിരുന്നു.
തുടര്‍ന്ന് രണ്ടുപേരെയും ആശുപത്രിയിലെത്തിച്ചു. എന്നാൽ നിവാന്റെ ജീവൻ രക്ഷിക്കാനായില്ല. മൃതദേഹം വടകര ജില്ലാ ആശുപത്രി മോർച്ചറിയിലേക്ക് മാറ്റി. രക്ഷപ്പെട്ട കുട്ടി വടകര സഹകരണ ആശുപത്രിയിൽ ചികിത്സയിലാണ്.
