ഷാർജ അൽനഹ്ദയിലെ താമസസമുച്ചയത്തിലുണ്ടായ തീപിടിത്തത്തിൽ 5 പേർ മരിച്ചെന്ന് പൊലീസ്. 44 പേർക്ക് പരിക്കേൽക്കുകയും ചെയ്തു. വ്യാഴാഴ്ച്ച രാത്രിയാണ് താമസസമുച്ചയത്തിൽ തീപിടിത്തമുണ്ടായത്. മരിച്ചവരുടെ വിശദാംശങ്ങൾ ലഭ്യമായിട്ടില്ല. സാരമായി പരുക്കേറ്റ 17 പേർ അത്യാഹിതവിഭാഗത്തിൽ ചികിത്സയിലാണ്.
രാത്രി 10.50ഓടെയാണ് 39നില കെട്ടിടത്തിന്റെ മുകൾ ഭാഗത്ത് തീപിടുത്തം കണ്ടെത്തിയത്. ഉടൻ താമസക്കാരെ കെട്ടിടത്തിൽ നിന്ന് ഒഴിപ്പിക്കുകയും രക്ഷാപ്രവർത്തകർ തീയ്യണക്കാനുള്ള നടപടികൾ സ്വീകരിക്കുകയും ചെയ്തു. സംഭവത്തിൽ മരിച്ചവരുടെ കുടുംബാംഗങ്ങളെ ഷാർജ പോലീസ് കമാൻഡറിൽ ചീഫ് ജനറൽ അനുശോചനം അറിയിച്ചു. ആളുകളെ മുഴുവനും എമിറേറ്റ്സ് റെഡ് ക്രസന്റ് സഹായത്തോടെ സുരക്ഷിതമായി മറ്റു ഹോട്ടലുകളിലേക്ക് മാറ്റിയതായി അദ്ദേഹം പറഞ്ഞു.
