മരണവീട്ടിൽ ഹോട്ടലാണെന്നു കരുതി മെനു കാർഡ് ചോദിച്ച വിദേശികൾക്ക് കുടുംബം നൽകിയത്
നഖോൺ സി തമ്മാരത്തിലെ ഒരു ശവസംസ്കാര ചടങ്ങിലേക്ക് അബദ്ധത്തിൽ എത്തിയ വിദേശ വിനോദസഞ്ചാരികളും അവിടെ അവർക്ക് ലഭിച്ച സ്നേഹനിർഭരമായ സ്വീകരണവുമാണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്.
സാധാരണയായി വിലാപവും നിശബ്ദതയും നിറഞ്ഞ അന്തരീക്ഷത്തിന് പകരം തായ്ലൻഡിലെ പരമ്പരാഗത ചടങ്ങുകളുടെ ഭാഗമായുള്ള വിരുന്നാണ് സഞ്ചാരികളെ ആശയക്കുഴപ്പത്തിലാക്കിയത്.
ജനുവരി 31ന് തെക്കൻ തായ്ലൻഡിലെ നഖോൺ സി തമ്മാരത്ത് നടന്ന ഒരു ശവസംസ്കാര ചടങ്ങിലായിരുന്നു കൗതുകകരമായ ഈ സംഭവം അരങ്ങേറിയത്.
ചടങ്ങിൽ പങ്കെടുത്തവർക്കായി ഭക്ഷണം ഒരുക്കിയ സ്ഥലത്തേക്ക് രണ്ട് ജർമൻ വിനോദസഞ്ചാരികൾ അപ്രതീക്ഷിതമായി കടന്നുവരികയായിരുന്നു.
തങ്ങൾ ഒരു റസ്റ്ററന്റിലേക്കാണ് എത്തിയതെന്ന പൂർണ്ണമായ വിശ്വാസത്തിലായിരുന്നു ജർമൻ സ്വദേശികളായ ആ സഞ്ചാരികൾ.
നൈറ്റ് മാർക്കറ്റിലൂടെ നടക്കുമ്പോൾ അവിടെനിന്നും ഉയർന്ന പാചകത്തിന്റെ കൊതിയൂറുന്ന സുഗന്ധം പിന്തുടർന്നാണ് അവർ ആ സദസ്സിലേക്ക് എത്തിയത്.
ഓൺലൈൻ സൈറ്റുകളിൽ നിന്നും പ്രദേശത്തെ പ്രശസ്തമായ ഭക്ഷണശാലകളെക്കുറിച്ച് വായിച്ചറിഞ്ഞ ഇവർ, അവിടെ കണ്ട തിരക്കും ഭക്ഷണവിഭവങ്ങളും ഒരു വലിയ ഫൂഡ് കോർട്ടിന്റേതാണെന്ന് തെറ്റിദ്ധരിച്ചു.
ചലോംകിയാഡ് എന്ന പ്രദേശവാസിയാണ് ഇവരുടെ വരവ് ആദ്യം ശ്രദ്ധിച്ചത്. പരിസരത്തെത്തിയ വിനോദസഞ്ചാരികൾക്ക് ഒരു സ്ത്രീ കുടിവെള്ളം നൽകിയതോടെ, അത് ഒരു ഭക്ഷണശാലയാണെന്ന് അവർ ഉറപ്പിച്ചു.
വെള്ളം ലഭിച്ചതിന് പിന്നാലെ വിനോദസഞ്ചാരികൾ അവിടെയുള്ളവരോട് ഫൂഡ് മെനു ചോദിച്ചപ്പോഴാണ് കാര്യങ്ങളുടെ നിജസ്ഥിതി വ്യക്തമായത്.
അത് ഒരു റസ്റ്ററന്റല്ലെന്നും മരിച്ച ഒരാളുടെ ഓർമയ്ക്കായി നാട്ടുകാരും ബന്ധുക്കളും ഒന്നിച്ചുകൂടിയ ശവസംസ്കാര ചടങ്ങാണെന്നും ചലോംകിയാഡ് അവരോട് വിശദീകരിച്ചു.
അപ്രതീക്ഷിതമായ ഈ വെളിപ്പെടുത്തൽ സഞ്ചാരികളെ വല്ലാതെ അമ്പരപ്പിച്ചു. ഒരു മരണവീട്ടിലാണ് തങ്ങൾ വന്നിറങ്ങിയതെന്ന തിരിച്ചറിവിൽ ജാള്യതയോടെ ഒരാൾ തലയിൽ കൈവെച്ചു പോയി. തങ്ങൾക്കുണ്ടായ തെറ്റായ ധാരണയ്ക്ക് അവർ സദസ്സിലുള്ളവരോട് ആവർത്തിച്ച് ക്ഷമാപണം നടത്തുകയും ചെയ്തു.
എന്നാൽ, ഗൗരവകരമായ ആ വിലാപയാത്രയ്ക്കിടയിലും അതിഥികളെ വെറുംകൈയോടെ വിടാൻ ആ കുടുംബം തയ്യാറായില്ല.
മരിച്ചയാളുടെ സഹോദരി മുന്നോട്ടുവരികയും ജർമൻ സഞ്ചാരികളെ സ്നേഹപൂർവ്വം ആഹാരം കഴിക്കാൻ ക്ഷണിക്കുകയും ചെയ്തു.
അവർ ആദ്യം മടിച്ചുവെങ്കിലും കുടുംബാംഗങ്ങളുടെ നിർബന്ധത്തിന് വഴങ്ങി വിഭവസമൃദ്ധമായ ആഹാരം കഴിച്ചു. തായ് ജനതയുടെ അതിഥി സൽക്കാര പ്രിയവും സ്നേഹവും അടുത്തറിഞ്ഞ അവർ നന്ദി പറഞ്ഞാണ് അവിടെനിന്നും മടങ്ങിയത്.
ഈ സംഭവം നടന്ന് രണ്ട് ദിവസത്തിന് ശേഷം ഇതേ സ്ഥലത്ത് സമാനമായ മറ്റൊരു അബദ്ധം കൂടി സംഭവിച്ചു എന്നത് ഏവരെയും അതിശയിപ്പിച്ചു.
ഇത്തവണ മൂന്ന് ഡച്ച് വിനോദസഞ്ചാരികളാണ് അതേ സ്ഥലത്തെത്തിയത്. ഇവിടെ കോക്ടെയിലുകൾ ലഭ്യമാണോ എന്നായിരുന്നു അവരുടെ അന്വേഷണം.
ചലോംകിയാഡ് വീണ്ടും ഇടപെടുകയും ഇതൊരു വിനോദസഞ്ചാര കേന്ദ്രമല്ല മറിച്ച് പരമ്പരാഗത ശവസംസ്കാര ചടങ്ങാണെന്ന് അവരെയും ധരിപ്പിച്ചു.
എന്നാൽ ജർമൻ സഞ്ചാരികളോടെന്ന പോലെ ഡച്ച് സഞ്ചാരികളോടും കുടുംബം ഒരേ കരുണയും സ്നേഹവുമാണ് പ്രകടിപ്പിച്ചത്. അവർക്കും ഭക്ഷണം നൽകി സന്തോഷത്തോടെയാണ് ആ കുടുംബം യാത്രയാക്കിയത്.
തായ്ലൻഡിലെ ശവസംസ്കാര ചടങ്ങുകൾ ദിവസങ്ങളോളം നീണ്ടുനിൽക്കുന്ന ഒന്നാണ്. പ്രാർത്ഥനകൾക്കൊപ്പം തന്നെ എത്തുന്നവർക്ക് ഭക്ഷണവും ലഘുഭക്ഷണവും നൽകുക എന്നത് അവിടുത്തെ സംസ്കാരത്തിന്റെ ഭാഗമാണ്.
വിയോഗത്തിന്റെ വേദനയ്ക്കിടയിലും വഴിതെറ്റിയെത്തിയ അപരിചിതർക്ക് അന്നം നൽകിയ ആ കുടുംബത്തിന്റെ മനസ്സ് ഇപ്പോൾ ലോകമെങ്ങും ചർച്ചയാവുകയാണ്.
