കാസർഗോഡ് 7 കോടി രൂപയുടെ വ്യാജ കറൻസി പിടിച്ചു. വ്യാജ കറൻസി സൂക്ഷിച്ച രണ്ടുപേർ വയനാട്ടിൽ നിന്ന് അറസ്റ്റിൽ ആയിട്ടുണ്ട്. പെരിയ സ്വദേശി അബ്ദുൽ റസാക്ക് മൗവ്വൽ സ്വദേശി സുലൈമാൻ എന്നിവരെയാണ് പോലീസ് അറസ്റ്റ് ചെയ്തത്. ബത്തേരിയിലെ സ്വകാര്യ ഹോം സ്റ്റൈയിൽ നിന്നാണ് ഇവരെ രണ്ടുപേരെയും ബത്തേരി പോലീസ് കസ്റ്റഡിയിലെടുത്തത്. ഇവർ കള്ളനോട്ട് കേസിലെ പ്രതികളാണ്.
കഴിഞ്ഞ ബുധനാഴ്ചയാണ് പോലീസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ കാസർഗോഡ് അമ്പലത്തറയിലെ അടച്ചിട്ട ഒരു വീട്ടിൽ നിന്നും ഏഴ് കോടിയുടെ രണ്ടായിരത്തിന്റെ കള്ള നോട്ടുകൾ പിടികൂടിയത്. അറസ്റ്റിൽ ആയ അബ്ദുൾ റസാഖ് ആണ് ആ വീട് വാടകക്കെടുത്തിരുന്നത്. തുടർന്ന് നടത്തിയ അന്വേഷണത്തിലാണ് ഇരുവരെയും വയനാട്ടിൽ നിന്ന് പിടികൂടിയിരിക്കുന്നത്. അമ്പലത്തറ പോലീസ് ഇവരെ നിരീക്ഷിച്ചു വരികയായിരുന്നു. ഇവർ വയനാട്ടിലേക്ക് കടന്നുവെന്ന് മനസ്സിലാക്കിയ പോലീസ് ബത്തേരി പോലീസിനെ വിവരം അറിയിക്കുകയായിരുന്നു. ബത്തേരി എസ്ഐയുടെ നേതൃത്വത്തിലുള്ള പോലീസ് അന്വേഷണത്തിനുശേഷം ഇവരെ കസ്റ്റഡിയിൽ എടുക്കുകയായിരുന്നു. എന്തിനുവേണ്ടിയാണ് ഇവർ ഈ പണം എത്തിച്ചത് എന്ന അന്വേഷണം തുടരുകയാണ്.
