ന്യൂഡല്ഹി: ക്ഷേത്ര ഉത്സവങ്ങളില് ആന എഴുന്നള്ളിപ്പുമായി ബന്ധപ്പെട്ട ഹൈക്കോടതി ഉത്തരവ് സുപ്രീം കോടതി സ്റ്റേ ചെയ്തു. ആന എഴുന്നള്ളിപ്പ് പൂര്ണ്ണമായി തടയാനുള്ള നീക്കമാണ് കേരള ഹൈക്കോടതി നടത്തുന്നതെന്ന് സുപ്രീംകോടതി നിരീക്ഷിച്ചു. ആന എഴുന്നള്ളിപ്പ് സംസ്കാരത്തിന്റെ ഭാഗമാണെന്നും സുപ്രീം കോടതി പറഞ്ഞു.
ജസ്റ്റിസുമാരായ ബി വി നാഗരത്ന, സതീഷ് ചന്ദ്ര ശര്മ്മ എന്നിവരടങ്ങിയ ബെഞ്ചിന്റേതാണ് നിരീക്ഷണം. വളര്ത്തുനായയായ ബ്രൂണോ കൊല്ലപ്പെട്ടതിനെ തുടര്ന്ന് സ്വമേധയാ എടുത്ത കേസിലാണ് ആന എഴുന്നള്ളിപ്പുമായി ബന്ധപ്പെട്ട നിയന്ത്രണങ്ങള് ഹൈക്കോടതി പുറപ്പടുവിച്ചതെന്നും സുപ്രീംകോടതി നിരീക്ഷിച്ചു. ഹൈക്കോടതിയുടെ ഡിവിഷന് ബെഞ്ച് പുറപ്പടുവിച്ച ഇടക്കാല ഉത്തരവിനെതിരെ വിശ്വ ഗജസേവാ സമിതിയാണ് സുപ്രീംകോടതിയെ സമീപിച്ചത്.
വിശ്വ ഗജസേവാ സമിതിക്കു വേണ്ടി ഹാജരായ സീനിയര് അഭിഭാഷകന് വികാസ് സിങ് ഹൈക്കോടതി ഡിവിഷന് ബെഞ്ചിലെ ജഡ്ജിമാര്ക്കെതിരെ സുപ്രീം കോടതിയിൽ ചില ആരോപണങ്ങള് ഉന്നയിച്ചു. ഡിവിഷന് ബെഞ്ചിലെ നടപടികള് പൂര്ണ്ണമായും സ്റ്റേ ചെയ്യണമെന്ന് അദ്ദേഹം ആവശ്യപ്പെട്ടു. കേരളത്തിലെ നാട്ടാനകളുടെ കണെക്കെടുപ്പിന് ഹൈക്കോടതി ഉത്തരവിട്ടത് ആന എഴുന്നള്ളിപ്പ് തടയാനാണെന്നും വികാസ് സിങ് ചൂണ്ടിക്കാട്ടി.
തുടര്ന്നാണ് സംസ്ക്കാരത്തിന്റെ ഭാഗമായ ആന എഴുന്നള്ളിപ്പ് തടയാനുള്ള നീക്കമാണ് ഹൈക്കോടതിയുടേതെന്ന് ജസ്റ്റിസ് നാഗരത്ന അഭിപ്രായപ്പെട്ടത്. സീനിയര് അഭിഭാഷകന് വികാസ് സിങ്ങിന് പുറമെ അഭിഭാഷകന് സി ആര് ജയസുകിയനും സംഘടനയ്ക്ക് വേണ്ടി സുപ്രീംകോടതിയില് ഹാജരായിരുന്നു.
