ബര്‍ലിന്‍: ജര്‍മനിയിലെ ന്യൂറംബര്‍ഗില്‍ അന്തരിച്ച മാസ്റ്റർ ബിരുദ വിദ്യാർത്ഥിനിയ്ക്ക് വിട നൽകി ജന്മനാട്. കോഴിക്കോട് കുറ്റ്യാടി സ്വദേശിനി ഡോണ ദേവസ്യ പേഴത്തുങ്കലിന്റെ (25) സംസ്കാരം നടന്നു. വെള്ളിയാഴ്ച രാവിലെയാണ് സംസ്കാര ചടങ്ങുകൾ നടന്നത്.
ചെമ്പനോട് ഇമ്മാക്കുലേറ്റ് കണ്‍സെപ്ഷന്‍ ഇടവക ദേവാലയത്തില്‍ വെച്ച് നടന്ന സംസ്കാര ശുശ്രൂഷകൾക്ക് താമരശേരി രൂപത അധ്യക്ഷന്‍ മാര്‍ റെമജിയോസ് ഇഞ്ചനാനിയിൽ മുഖ്യകാര്‍മ്മികത്വം വഹിച്ചു. കുറ്റ്യാടി ചക്കിട്ടപാറ പേഴത്തുങ്കല്‍ ദേവസ്യയുടെയും മോളിയുടെയും മകളാണ് ഡോണ. ഫെബ്രുവരി 24നാണ് മരണം സംഭവിച്ചത്.
ജര്‍മനിയിലെ വൈഡന്‍ യൂണിവേഴ്സിറ്റിയില്‍ ഇന്റര്‍നാഷനല്‍ മാനേജ്മെന്റ് വിഷയത്തില്‍ മാസ്ററര്‍ ബിരുദ വിദ്യാര്‍ഥിനിയായിരുന്ന് ഡോണ. മൃതദേഹം പോസ്ററ് മോര്‍ട്ടത്തിനു ശേഷം നടപടിക്രമങ്ങള്‍ പൂര്‍ത്തിയാക്കി ജര്‍മനിയിലെ ഇന്ത്യന്‍ എംബസിയുടെ സഹായത്തോടെ വ്യാഴാഴ്ച രാത്രിയാണ് ജന്മനാട്ടിലെത്തിച്ചത്. രണ്ടു വർഷം മുൻപ് ജർമനിയിലെത്തിയ ഡോണ ജോലി സംബന്ധമായി ന്യൂറംബര്‍ഗിലാണ് താമസിച്ചിരുന്നത്.
