കൈയ്യിൽ സിനിമക്കഥയുണ്ടോ? സനിമയാക്കാൻ സൂപ്പർതാരം റെ‍ഡി; അവസരവുമായി പ്രഭാസിൻറെ പുതിയ വെബ്സൈറ്റ്

സ്വന്തം തിരക്കഥയുമായി സിനിമ എന്ന സ്വപ്നത്തിലേയ്ക്ക് എത്താൻ ഏറെ നാളായി അലഞ്ഞു തിരിഞ്ഞു കഷ്ട്ടപ്പെടുന്ന നിരവധി ചെറുപ്പക്കാർ നമുക്ക് ചുറ്റുമുണ്ട്. അത്തരക്കാർക്കായി ഇതാ സൂപ്പർ സ്റ്റാർ പ്രഭാസ് അവസരങ്ങളുടെ ഒരു പുതിയ ലോകം തുറന്നിടുന്നു. പ്രഭാസ് ആരംഭിക്കുന്ന പുതിയ വെബ്സൈറ്റായ ദി സ്ക്രിപ്റ്റ് ക്രാഫ്റ്റിൽ എഴുത്തുകാർക്ക് അവരുടെ പക്കലുള്ള തിരക്കഥയുടെ ആശയം സമർപ്പിക്കാം.

ഉന്നത നിലവാരത്തിലുള്ള സ്പെഷ്യൽ എഫക്ടുളും നിർമാണ രീതികളുമായി ഇന്ത്യൻ സിനിമയെ പുതിയ ഉയരങ്ങളിലേക്ക് എത്തിച്ച പ്രഭാസ് ചിത്രങ്ങളായിരുന്നു ബാഹുബലിയും കൽക്കിയും.എന്നാൽ ഗ്രാഫിക്സിനപ്പുറം കെട്ടുറപ്പുള്ള, വൈവിധ്യമായ ഒരു കഥാപശ്ചാത്തലം കൂടി ഈ രണ്ടു ചിത്രങ്ങൾക്കും ഉണ്ടായിരുന്നു. ഇത്തരം വൈവിധ്യമായ കഥകളോടുള്ള അഭിനിവേശവും പ്രഭാസിൻറെ പാൻ ഇന്ത്യൻ സൂപ്പർ സ്റ്റാർ എന്ന വിശേഷണത്തിന് മാറ്റ് കൂട്ടുന്നുണ്ട്. ഇത്തരത്തിലുള്ള പുതിയ കഥകൾ കണ്ടെത്തുന്നതിൻറെ ഭാഗമായിട്ടാണ് പ്രഭാസിൻറെ ഈ വേറിട്ട പരീക്ഷണം.

250 വാക്കുകളിൽ ഒതുങ്ങി നിന്നായിരിക്കണം ആശയം സമർപ്പിക്കേണ്ടത്‌. ഈ ആശയങ്ങൾ പ്രേക്ഷകർക്ക്‌ വായിക്കാനും അഭിപ്രായങ്ങൾ പങ്കുവയ്ക്കാനും ആശയത്തിൻറെ നിലവാരമനുസരിച്ചു റേറ്റിംഗ് നൽകാനും അവസരമുണ്ട്. ഏറ്റവും കൂടുതൽ റേറ്റിംഗ് ലഭിക്കുന്ന ചലച്ചിത്ര ആശയങ്ങൾ തെരെഞ്ഞെടുത്തു സിനിമ ആക്കും.

വെബ്സൈറ്റ് ലോഞ്ചിംഗിന്റെ ഭാഗമായി സ്വന്തം ഇഷ്ട്ടതാരത്തെ ഒരു സൂപ്പർ ഹീറോ ആയി സങ്കൽപ്പിച്ചു 3500 വാക്കിൽ ഒതുങ്ങി നിൽക്കുന്ന ഒരു കഥാമത്സരവും എഴുത്തുകാർക്കായി പ്രഭാസ് ഒരുക്കുന്നുണ്ട്‌. പ്രേക്ഷകരുടെ വിലയിരുത്തലിൻറെ അടിസ്ഥാനത്തിലായിരിക്കും മത്സരത്തിൻറെ വിജയിയെ തീരുമാനിക്കുന്നത്. മത്സരത്തിലെ വിജയികൾക്ക് പ്രഭാസിൻറെ വരാനിരിക്കുന്ന സിനിമകളിൽ സഹ സംവിധായകനായോ, സഹ രചയിതാവയോ പ്രവർത്തിക്കാനുള്ള അവസരം ലഭിക്കുന്നതാണ്.

പ്രശസ്ത തെലുങ്ക് നിർമ്മാതാവായ പ്രമോദ് ഉപ്പളപദിയും സംവിധായകൻ വൈഷ്ണവ് താള്ളായുമാണ് ദി സ്ക്രിപ്റ്റ് ക്രാഫ്റ്റ് എന്ന വെബ്സൈറ്റിൻറെ സ്ഥാപകർ. ദി സ്ക്രിപ്റ്റ് ക്രാഫ്റ്റ് തെരഞ്ഞെടുക്കുന്ന കഥകളെ ഓഡിയോ ബുക്ക് പ്ലാറ്റ് ഫോമിലൂടെ പ്രേക്ഷകരുടെ മുന്നിലേയ്ക്ക് എത്തിക്കാനും പ്രഭാസ് പദ്ധതിയിടുന്നുണ്ട്. പ്രഭാസ് തൻറെ ഇൻസ്റ്റാഗ്രാം പേജിലൂടെയാണ് ഈ വാർത്ത പുറത്തുവിട്ടത്. പുതിയ എഴുത്തുകാരെ പ്രോത്സാഹിപ്പിക്കുന്നതിനും സിനിമ എന്ന സ്വപ്നത്തിലേയ്ക്കു കൈപിടിച്ചുയർത്തുന്നതിനുമാണ് പ്രഭസിൻറെ ഈ പുതിയ ഉദ്യമം.

thescriptcraft.com

https://www.instagram.com/p/DCBLY0yi4q2/?igsh=MWdiY3prYWxvMnJnZA==