യുവാക്കൾക്കിടയിൽ തരംഗമായി ‘സൈബർ കുമ്പസാരക്കൂടുകൾ’
ചൈനയിലെ യുവതലമുറ തങ്ങളുടെ ആന്തരിക സംഘർഷങ്ങളും ആർക്കും അറിയാത്ത രഹസ്യങ്ങളും വെളിപ്പെടുത്താൻ ‘സൈബർ കൺഫെഷൻ റൂമുകൾ’ എന്ന നൂതന മാർഗ്ഗം തിരഞ്ഞെടുത്തിരിക്കുകയാണ്.
കുടുംബാംഗങ്ങളോടോ അടുത്ത സുഹൃത്തുക്കളോടോ പറയാൻ മടിക്കുന്ന കാര്യങ്ങൾ, പേരും വിലാസവും വെളിപ്പെടുത്താതെ ഡിജിറ്റൽ ലോകത്ത് തുറന്നുപറയാമെന്നതാണ് ഈ വിർച്വൽ പ്ലാറ്റ്ഫോമുകളുടെ പ്രത്യേകത.
വ്യക്തിപരമായ വീഴ്ചകൾ, സാമ്പത്തിക പ്രതിസന്ധികൾ, മനസ്സിൽ വേട്ടയാടുന്ന കുറ്റബോധം എന്നിവയെല്ലാം പങ്കുവെക്കാൻ ലക്ഷക്കണക്കിന് യുവാക്കളാണ് ഇപ്പോൾ ചൈനീസ് സോഷ്യൽ മീഡിയയിൽ സജീവമാകുന്നത്.
യഥാർത്ഥ ജീവിതത്തിലെ ബന്ധങ്ങളേക്കാൾ ഡിജിറ്റൽ ലോകത്തെ അജ്ഞാതരായ മനുഷ്യരോട് മനസ്സ് തുറക്കുന്നതാണ് സുരക്ഷിതമെന്ന് ഇവർ കരുതുന്നു.
സോഷ്യൽ മീഡിയയിൽ ഒരു ശൂന്യമായ മുറിയുടെ ചിത്രം പോസ്റ്റ് ചെയ്തുകൊണ്ടാണ് ഈ ട്രെൻഡ് ആരംഭിക്കുന്നത്.
ഒറ്റനോട്ടത്തിൽ നിസ്സാരമെന്ന് തോന്നുന്ന ഈ പോസ്റ്റുകളുടെ കമന്റ് ബോക്സുകൾ പരിശോധിച്ചാൽ ആധുനിക മനുഷ്യൻ അനുഭവിക്കുന്ന ഉത്കണ്ഠകളുടെയും രഹസ്യങ്ങളുടെയും ഒരു വലിയ ലോകം തന്നെ കാണാം.
തങ്ങളെ ആരും തിരിച്ചറിയില്ല എന്ന ഉറപ്പുള്ളതിനാൽ, മറ്റൊരിടത്തും പറയാത്ത കാര്യങ്ങൾ അവർ അവിടെ ടൈപ്പ് ചെയ്ത് വിടുന്നു.
ക്രൈസ്തവ ദേവാലയങ്ങളിലെ കുമ്പസാര രീതിയെ അനുസ്മരിപ്പിക്കുന്നതിനാലാണ് ഇതിന് ‘സൈബർ കുമ്പസാരക്കൂടുകൾ’ എന്ന് പേര് വന്നത്.
നിലവിൽ 50 ദശലക്ഷത്തിലധികം ആളുകൾ ചൈനയിലെ വിവിധ പ്ലാറ്റ്ഫോമുകളിലായി ഈ വിചിത്രമായ പ്രവണത പിന്തുടരുന്നുണ്ട്.
ഈ ഡിജിറ്റൽ ഇടങ്ങളിൽ എത്തുന്ന വെളിപ്പെടുത്തലുകൾ വൈവിധ്യപൂർണ്ണമാണ്. ചിലർ വളരെ നിസ്സാരമായ തമാശകളോ ചെറിയ തെറ്റുകളോ ആണ് പങ്കുവെക്കുന്നത്.
സുഹൃത്തുക്കളെ പറ്റിച്ചതും, പഠനത്തിൽ കാണിച്ച മടിയും, സോഷ്യൽ മീഡിയയിൽ പ്രശസ്തിക്കായി വ്യാജ ബാഗുകൾ പ്രദർശിപ്പിച്ചതും ഒക്കെ ഇതിൽ ഉൾപ്പെടുന്നു.
എന്നാൽ മറ്റുചിലർ പങ്കുവെക്കുന്നത് കേൾക്കുന്നവരുടെ ഉള്ളുലയ്ക്കുന്ന സത്യങ്ങളാണ്. പഠനം പാതിവഴിയിൽ ഉപേക്ഷിച്ചതും വീട്ടുകാർ അറിയാതെ പണം ധൂർത്തടിച്ചതും ഒക്കെ ഇതിലുണ്ട്.
ഒരു യുവാവ് തന്റെ കടം വീട്ടാൻ അന്തരിച്ച അമ്മയുടെ ഇൻഷുറൻസ് തുക ഉപയോഗിച്ചുവെന്ന വെളിപ്പെടുത്തൽ സൈബർ ലോകത്ത് വലിയ ചർച്ചയാവുകയും വിമർശിക്കപ്പെടുകയും ചെയ്തു.
കുട്ടിക്കാലത്തെ ഓർമ്മകളും പലരെയും ഇപ്പോഴും വേട്ടയാടുന്നുണ്ടെന്ന് ഈ കുമ്പസാരക്കൂടുകൾ തെളിയിക്കുന്നു.
വീട്ടുകാരെ ഭയന്ന് ഒരു പൂച്ചക്കുട്ടിയെ ഗാരേജിൽ ഒളിപ്പിച്ചു വെച്ചതും അത് പട്ടിണി കിടന്ന് മരിച്ചതും ഇന്നും ഒരു ഭാരമായി മനസ്സിൽ കൊണ്ടുനടക്കുന്നുവെന്ന് മറ്റൊരാൾ കുറിച്ചു.
ഇത്തരത്തിൽ വർഷങ്ങളോളം മനസ്സിൽ കൊണ്ടുനടന്ന പാപഭാരം ഇറക്കിവെക്കാനുള്ള ഒരിടമായിട്ടാണ് യുവാക്കൾ ഇതിനെ കാണുന്നത്.
ആധുനിക ചൈനീസ് സമൂഹത്തിൽ യുവതലമുറ നേരിടുന്ന മാനസിക സമ്മർദ്ദത്തിന്റെയും ഒറ്റപ്പെടലിന്റെയും ഒരു നേർക്കാഴ്ച കൂടിയാണ് ഈ സൈബർ കൺഫെഷൻ റൂമുകൾ.
