പോലീസ് സ്റ്റേഷന് മുന്നിൽ കമിതാക്കളുടെ ആത്മഹത്യാശ്രമം
ഉത്തർപ്രദേശിലെ ജലൗൺ ജില്ലയിൽ വീട്ടുകാർ വിവാഹത്തിന് സമ്മതിക്കാത്തതിനെത്തുടർന്ന് പോലീസ് സ്റ്റേഷന് മുന്നിൽ കമിതാക്കൾ ആത്മഹത്യയ്ക്ക് ശ്രമിച്ചത് വലിയ പരിഭ്രാന്തി പരത്തി. മാർച്ച് 10 ചൊവ്വാഴ്ച രാത്രിയാണ് സംഭവം നടന്നത്.
തങ്ങളെ വിവാഹം കഴിക്കാൻ അനുവദിച്ചില്ലെങ്കിൽ ജീവനൊടുക്കുമെന്ന് പ്രഖ്യാപിച്ചുകൊണ്ട് യുവാവും പെൺകുട്ടിയും പോലീസ് സ്റ്റേഷന് മുന്നിലെത്തി സ്വന്തം ദേഹത്ത് ഡീസൽ ഒഴിക്കുകയായിരുന്നു.
കയ്യിൽ തീപ്പെട്ടിയുമായി റോഡിൽ കുത്തിയിരുന്ന് ഇവർ ഭീഷണി മുഴക്കിയതോടെ പ്രദേശത്ത് തടിച്ചുകൂടിയവർ ഭയചകിതരായി. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
സ്ഥിതിഗതികൾ കൈവിട്ടുപോകുമെന്ന് കണ്ടതോടെ സ്റ്റേഷൻ ഹൗസ് ഓഫീസർ നേരിട്ടെത്തി കമിതാക്കളെ അനുനയിപ്പിക്കാൻ ശ്രമിച്ചു.
“ഞാനാണ് ഈ സ്റ്റേഷന്റെ ഇൻചാർജ്, നിങ്ങളുടെ വിവാഹം ഞാൻ നടത്തിത്തരാം, പൂജാരിയെ വിളിക്കാം, ഉള്ളിൽ ക്ഷേത്രമുണ്ട്, എന്നെ വിശ്വസിക്കൂ” എന്ന് സ്നേഹപൂർവ്വം സംസാരിച്ചുകൊണ്ട് ഓഫീസർ യുവാവിനോട് അടുത്തു.
പോലീസ് ഉദ്യോഗസ്ഥന്റെ പക്വമായ ഇടപെടലിനൊടുവിൽ യുവാവിന്റെ കയ്യിൽ നിന്നും തീപ്പെട്ടിയും ഇന്ധനക്കുപ്പിയും പിടിച്ചുവാങ്ങാൻ പോലീസിന് സാധിച്ചു. ഇതോടെ വലിയൊരു ദുരന്തമാണ് ഒഴിവായത്.
തുടർന്ന് ഇവരെ പോലീസ് കസ്റ്റഡിയിലെടുത്ത് വിശദമായി ചോദ്യം ചെയ്തപ്പോഴാണ് സംഭവത്തിൽ മറ്റൊരു ട്വിസ്റ്റ് ഉണ്ടായത്. പ്രാഥമിക അന്വേഷണത്തിൽ പെൺകുട്ടിക്ക് പ്രായപൂർത്തിയായിട്ടില്ലെന്ന് പോലീസിന് ബോധ്യപ്പെട്ടു.
ഇതോടെ കാര്യങ്ങൾ യുവാവിന് എതിരായി മാറി. നിയമപരമായി വിവാഹം കഴിക്കാൻ പ്രായമാകാത്ത പെൺകുട്ടിയെ പ്രലോഭിപ്പിച്ചെന്നാരോപിച്ച് പെൺകുട്ടിയുടെ പിതാവ് യുവാവിനെതിരെ പോലീസിൽ പരാതി നൽകി.
മകളുടെ സുരക്ഷയെക്കരുതിയാണ് തങ്ങൾ വിവാഹത്തെ എതിർത്തതെന്ന് വീട്ടുകാർ പോലീസിനെ അറിയിച്ചു. നിലവിൽ പെൺകുട്ടിയെ ശാസ്ത്രീയമായ വൈദ്യപരിശോധനയ്ക്കും കൗൺസിലിംഗിനുമായി അയച്ചിരിക്കുകയാണ്.
ജലൗൺ പോലീസ് തങ്ങളുടെ ഔദ്യോഗിക സോഷ്യൽ മീഡിയ അക്കൗണ്ടുകൾ വഴി സംഭവത്തിന്റെ വിശദാംശങ്ങൾ പുറത്തുവിട്ടു.
പ്രായപൂർത്തിയാകാത്ത പെൺകുട്ടിയുമായി ബന്ധപ്പെട്ട കേസ് ആയതിനാൽ നിയമപരമായ എല്ലാ നടപടികളും കൃത്യമായി പാലിക്കുമെന്ന് പോലീസ് വ്യക്തമാക്കി. യുവാവിനെതിരെ രജിസ്റ്റർ ചെയ്ത പരാതിയിൽ അന്വേഷണം തുടരുകയാണ്.
