മറിയക്കുട്ടിക്ക് വീടൊരുക്കി നൽകുമെന്ന് കോൺഗ്രസ്; കെ സുധാകരന്‍ അഞ്ച് ലക്ഷം രൂപ നല്‍കി; ഉടൻ നിർമ്മാണം ആരംഭിക്കും

ക്ഷേമ പെൻഷൻ ലഭിക്കാത്തതിൽ പ്രതിഷേധിച്ച് സമരം ചെയ്തു സർക്കാരിന്റെ കണ്ണിലെ കരടായി മാറിയ മറിയക്കുട്ടിക്ക് വീടൊരുക്കി നൽകുമെന്ന് കോൺഗ്രസ്. വീട് വച്ച് നല്‍കുമെന്ന് കെപിസിസി വൈസ് പ്രസിഡന്റ് വി പി സജീന്ദ്രന്‍ പറഞ്ഞു. വീട് നിര്‍മാണം ഉടന്‍ നടക്കുമെന്നും കെ സുധാകരന്‍ ഇതിനോടകം അഞ്ച് ലക്ഷം രൂപ നല്‍കിയിട്ടുണ്ടെന്നും വി പി സജീന്ദ്രന്‍ പറഞ്ഞു. മറിയക്കുട്ടിക്ക് വീടും സ്ഥലവുമുണ്ടെന്നായിരുന്നു ദേശാഭിമാനിയില്‍ വന്ന വാര്‍ത്ത. പിന്നാലെ വിവിധ പ്രതികരണങ്ങളുമെത്തി. എന്നാല്‍ സംഭവം വിവാദമായതോടെ ദേശാഭിമാനി പിശക് സംഭവിച്ചതാണെന്ന് തിരുത്തുകയും ഖേദം പ്രകടിപ്പിക്കുകയുമായിരുന്നു. ഇപ്പോള്‍ മറിയക്കുട്ടി താമസിക്കുന്ന വീടും പുരയിടവും ഇളയമകള്‍ പ്രിന്‍സിയുടെ പേരിലാണ്. അടിമാലി പഞ്ചായത്തിലാണ് ഈ വീടുള്ളത്. മറിയക്കുട്ടിക്ക് സ്വന്തം പേരില്‍ ഒന്നരയേക്കര്‍ സ്ഥലമുണ്ടെന്നും രണ്ട് വീടുകളുണ്ടെന്നും ഇത് വാടകയ്ക്ക് നല്‍കിയിരിക്കുകയാണെന്നും പ്രചാരണം നടന്നിരുന്നു. പിന്നാലെ അതെല്ലാം കള്ളമാണെന്നും തെളിഞ്ഞു. മറിയക്കുട്ടിക്ക് കെപിസിസി വീട് വച്ചുനല്‍കുമെന്ന് അധ്യക്ഷന്‍ കെ സുധാകരന്‍ നേരത്തെ പറഞ്ഞിരുന്നു.