ദേവി ദർശനപുണ്യം; ഇന്ന് ചോറ്റാനിക്കര മകം തൊഴൽ!
കൊച്ചി: ചോറ്റാനിക്കര ദേവീക്ഷേത്രത്തിലെ പ്രസിദ്ധമായ മകം തൊഴൽ ഇന്ന് ഭക്തിപൂർവം നടക്കും. ഉച്ചയ്ക്ക് 2 മണിമുതൽ മകം തൊഴൽ ആരംഭിച്ച് രാത്രി 9.30 വരെ ദർശന സൗകര്യം ഉണ്ടായിരിക്കും.
തിങ്കളാഴ്ച പുലർച്ചെ 5.30ന് ഓണക്കുറ്റിചിറയിൽ ആറാട്ടോടെയാണ് ചടങ്ങുകൾക്ക് തുടക്കമാകുന്നത്. തുടർന്ന് വടക്കേപൂരപ്പറമ്പിൽ പാണ്ടിമേളത്തിന്റെ അകമ്പടിയോടെ മകം എഴുന്നള്ളിപ്പ് നടക്കും.
ക്ഷേത്രാങ്കണത്തിൽ തിരിച്ചെത്തിയ ശേഷം നിത്യച്ചടങ്ങുകളും ശ്രീഭൂതബലിയും പൂർത്തിയാക്കി അലങ്കാരത്തിനായി നട അടയ്ക്കും.
ഉച്ചയ്ക്ക് 1 മണിമുതൽ ചോറ്റാനിക്കര മുരളീധര മാരാരുടെയും സംഘത്തിന്റെയും പാണ്ടിമേളം അരങ്ങേറും. ഉച്ചയ്ക്ക് 2 മണിക്ക് മകം തൊഴലിനായി നട തുറന്നാൽ ഇടവേളയില്ലാതെ രാത്രി 9.30 വരെ ഭക്തർക്ക് ദർശനം നടത്താം.
ഭക്തജനങ്ങളുടെ സൗകര്യാർത്ഥം ക്ഷേത്രത്തിനകത്തും പുറത്തും പ്രത്യേക ബാരിക്കേഡുകളും താത്കാലിക പന്തലുകളും ഒരുക്കിയിട്ടുണ്ട്.
വില്വമംഗലം സ്വാമിയാർക്ക് മകം നാളിൽ ദേവി സർവാഭരണവിഭൂഷിതയായി ദർശനം നൽകിയതെന്ന ഐതിഹ്യവുമായി ബന്ധപ്പെട്ടാണ് മകം തൊഴലിന്റെ ആചരണം.
ഈ ദിവസം ദേവിക്ക് വരദാഭയ മുദ്രകളോടുകൂടിയ പ്രത്യേക തങ്കഗോളക ചാർത്തും. സ്വർണക്കിരീടം, വിശേഷാൽ സ്വർണാഭരണങ്ങൾ, പട്ടുടയാടകൾ, പുഷ്പാലങ്കാരങ്ങൾ എന്നിവയോടെ ദേവിയെ അലങ്കരിക്കും. ശ്രീകോവിലിൽ നെയ്ത്തിരി ദീപങ്ങൾ തെളിയും.
മകം നാളിൽ ലക്ഷക്കണക്കിന് ഭക്തരാണ് ദർശനത്തിനായി എത്താറുള്ളത്. സ്ത്രീകൾക്കും പുരുഷന്മാർക്കും പ്രത്യേകം ക്യൂ ക്രമീകരിച്ചിട്ടുണ്ട്. കനത്ത സുരക്ഷാ സംവിധാനമാണ് ഒരുക്കിയിരിക്കുന്നത്.
ജില്ലാ പൊലീസ് മേധാവി കെ.എസ്. സുദർശന്റെ നേതൃത്വത്തിൽ അഞ്ച് ഡിവൈഎസ്പിമാർ ഉൾപ്പെടെ ഏകദേശം 800 പൊലീസ് ഉദ്യോഗസ്ഥരെ വിന്യസിച്ചിട്ടുണ്ട്. മകം ദർശനത്തിന് ശേഷം മേളത്തോടുകൂടി മകം വിളക്കിനെഴുന്നള്ളിപ്പും നടക്കും.
English Summary
The famous Makam Thozhal ritual at Chottanikkara Devi Temple will be held today from 2 pm to 9:30 pm. Ceremonies begin early morning with Aarattu, followed by a grand procession and Pandimelam. The goddess will be adorned with special golden ornaments and decorations as per legend associated with Vilwamangalam Swamiyar. Lakhs of devotees are expected, and elaborate security arrangements have been made with around 800 police personnel deployed.
chottanikkara-makam-thozhal-2026
Chottanikkara Temple, Makam Thozhal, Kerala Temple Festival, Devotional News, Temple Security, Pandimelam
