തിരുവനന്തപുരം: മുഖ്യമന്ത്രിയുടെ വാഹനവ്യൂഹം കൂട്ടിയിടിച്ച് അപകടം. തിരുവനന്തപുരം വാമനപുരം പാർക്ക് ജംഗ്ഷനിലാണ് അപകടമുണ്ടായത്. സ്കൂട്ടർ യാത്രക്കാരിയെ രക്ഷിക്കാൻ ശ്രമിക്കുകയായിരുന്നതിനിടെയാണ് സംഭവം.(Chief minister’s convoy collided in thiruvananthapuram)
മുഖ്യമന്ത്രിയുടെ വാഹനത്തിന് എസ്‌കോർട്ട് വന്ന നാലു വാഹനങ്ങളാണ് കൂട്ടിയിടിച്ചത്. ഒരു കമാന്‍ഡോ വാഹനം, രണ്ട് പൊലീസ് വാഹനം, ഒരു ആംബുലന്‍സ് എന്നിവയാണ് അപകടത്തിൽപ്പെട്ടത്. ഈ വാഹനങ്ങൾ മുഖ്യമന്ത്രിയുടെ വാഹനത്തിന്റെ പിറകിലും ഇടിച്ചു.
അപകടത്തിൽ ആർക്കും പരിക്കില്ല എന്നാണ് വിവരം. മുഖ്യമന്ത്രി കോട്ടയത്ത് നിന്ന് തിരുവനന്തപുരത്തേക്ക് യാത്ര ചെയ്യുകയായിരുന്നു. അപകടം നടന്നെങ്കിലും മുഖ്യമന്ത്രി വാഹനത്തിന് പുറത്തേക്ക് ഇറങ്ങിയില്ല. അദ്ദേഹം തലസ്ഥാനത്തേക്ക് യാത്ര തുടർന്നു.
