മുഖ്യമന്ത്രിയുടെ ദുരിതാശ്വാസനിധിയിലേക്കു സംഭാവന ചെയ്യണമെന്ന അഭ്യര്ഥനയ്ക്ക് എതിരെ പ്രചാരണം നടത്തിയവർക്കെതിരെ സംസ്ഥാന വ്യാപകമായി 14 കേസുകൾ റജിസ്റ്റര് ചെയ്തു. (campaign against the request to donate to the Chief Minister’s Relief Fund; 14 cases state wide)
തിരുവനന്തപുരം സിറ്റിയില് നാലും എറണാകുളം സിറ്റിയിലും പാലക്കാടും രണ്ടു വീതവും കൊല്ലം സിറ്റി, എറണാകുളം റൂറല്, തൃശൂര് സിറ്റി, മലപ്പുറം, വയനാട്, തിരുവനന്തപുരം റൂറല് എന്നിവിടങ്ങളില് ഓരോ കേസ് വീതവുമാണു റജിസ്റ്റര് ചെയ്തിരിക്കുന്നത്.
ഇത്തരം പ്രചാരണങ്ങൾ നടത്തിയ 194 പോസ്റ്റുകള് സാമൂഹിക മാധ്യമങ്ങളില് കണ്ടെത്തുകയും അവ നീക്കം ചെയ്യുന്നതിന് അതതു സാമൂഹ്യമാധ്യമങ്ങൾക്കു നിയമപ്രകാരമുള്ള നോട്ടിസ് നല്കുകയും ചെയ്തതായി പൊലീസ് അറിയിച്ചു.
ദുരിതാശ്വാസനിധിക്കെതിരെയുള്ള വ്യാജപ്രചാരണങ്ങള് നിരീക്ഷിക്കുന്നതിനായി സാമൂഹിക മാധ്യമങ്ങളില് സൈബര് പട്രോളിങ് ശക്തമാക്കിയതായും കർശന നടപടികൾ കൈക്കൊള്ളുമെന്നും പോലീസ് അറിയിച്ചു.
