കക്കോടി: കക്കോടി പാലത്തിനു വലതുവശത്തൂടെ സാധനം വാങ്ങാൻ നടന്നുപോവുകയായിരുന്നു 72കാരനായ മാധവൻ നമ്പീശൻ. കക്കോടി പഞ്ചായത്ത് ഓഫിസിനടുത്തുള്ള വളവിലെത്തിയപ്പോഴേക്കും ഓറഞ്ചുമായി വേഗത്തിലെത്തിയ ഗുഡ്സ് ഓട്ടോറിക്ഷയിലെ നിവർത്തിവെച്ച അലങ്കാരക്കുട മാധവൻ നമ്പീശന്റെ ദേഹത്തേക്ക് ചരിഞ്ഞുവീണു.
താനെ നിവർന്ന കുട തലയിൽ കൊളുത്തിയതോടെ മാധവൻ നമ്പീശൻ റോഡിലേക്ക് തെറിച്ചുവീഴുകയായിരുന്നു. ഓട്ടോറിക്ഷക്കു തൊട്ടുപിന്നാലെ എത്തിയ കാർ ശരീരത്തിൽ ഇടിക്കുന്നതിന് മുമ്പേ ഡ്രൈവർ വെട്ടിച്ചുമാറ്റുകയായിരുന്നു. കാർ ഡ്രൈവറുടെ ശ്രദ്ധകൊണ്ടുമാത്രം മാധവൻ നമ്പീശന്റെ ജീവൻ രക്ഷപ്പെട്ടു എന്നു പറയാം. തലക്കും കൈക്കും കാലിനും പരിക്കേറ്റ മാധവൻ നമ്പീശൻ പിന്നീട്ആശുപത്രിയിൽ ചികിത്സതേടി.
എച്ച്.ആർ ആൻഡ് സി റിട്ട. ജീവനക്കാരനായ മാധവൻ നമ്പീശനെ ഓട്ടോ ഡ്രൈവർ ആദ്യം ഹോമിയോ ഡിസ്പൻസറിയിലേക്കാണ് കൊണ്ടുപോയതത്രെ. പിന്നീട് ബന്ധുക്കൾ കക്കോടി പ്രാഥമികാരോഗ്യ കേന്ദ്രത്തിലെത്തിക്കുകയായിരുന്നു. അപകടത്തിന്റെ വിഡിയോ സമൂഹമാധ്യമങ്ങളിൽ പ്രചരിക്കുന്നുണ്ട്. ചേവായൂർ പൊലീസ് ഇയാളുടെ മൊഴിയെടുത്ത് അന്വേഷണം ആരംഭിച്ചു.
മടക്കിവെച്ച കുടയിൽ കാറ്റുപിടിക്കുകയായിരുന്നു. കുട ചരിഞ്ഞതോടെ കാറ്റ് കയറി നിവർന്ന് തലയിൽ കുരുങ്ങുകയായിരുന്നു. ഓട്ടോ ഡ്രൈവർ പറഞ്ഞത് ഇങ്ങനെയാണ്. കുട നിവർത്തിയാണ് വണ്ടിയിൽവെച്ചതെന്നാണ് ദൃക്സാക്ഷികൾ പറയുന്നത്. സമീപത്തെ സി.സി.ടി.വി ദൃശ്യങ്ങൾ പൊലീസ് പരിശോധിക്കുന്നുണ്ട്.
‘ദൈവകടാക്ഷം, രക്ഷപ്പെട്ടത് വലിയ അപകടത്തിൽനിന്നാ, എന്താ പറ്റീത് ന്ന് ഒരു നിശ്ചയവുമില്ലാർന്നു. റോഡിലേക്ക് തെറിച്ചാ വീണത്’ -തലനാരിഴ വ്യത്യാസത്തിൽനിന്ന് ജീവൻ തിരിച്ചുകിട്ടിയ തണ്ണീർപന്തൽ സുബ്രഹ്മണ്യ സ്വാമി ക്ഷേത്രത്തിനരികിലെ മാധവൻ നമ്പീശൻ മാധ്യമങ്ങളോട് പറഞ്ഞു.
