കുറച്ചു ദിവസങ്ങളായി ബിഎസ്എൻഎൽ ഉപയോക്താക്കൾക്ക് കെവൈസിയുമായി ബന്ധപ്പെട്ട് പലതരത്തിലുള്ള മെസ്സേജുകൾ ലഭിക്കുന്നുണ്ട്. ഉപയോക്താക്കൾ തങ്ങളുടെ KYC ഉടൻ അപ്ഡേറ്റ് ചെയ്തില്ലെങ്കിൽ സിം കാർഡ് ഡീആക്റ്റിവേറ്റ് ചെയ്യപ്പെടും എന്നതാണ് സന്ദേശങ്ങളുടെ ഉള്ളടക്കം.
ബിഎസ്എൻഎൽ, ട്രായ് എന്നിവർ അയക്കുന്നതെന്ന രീതിയിലാണ് ഇത് ഉപയോക്താക്കൾക്ക് എത്തുന്നത്. ഇതിൽ എന്തെങ്കിലും സത്യമുണ്ടോ? ഈ ചോദ്യത്തിന് ഉത്തരവുമായി എത്തിയിരിക്കുകയാണ് ബിഎസ്എൻഎൽ.
തങ്ങളുടേതെന്ന പേരിൽ വരുന്ന വ്യാജ സന്ദേശങ്ങൾക്കെതിരെയാണ് ബി.എസ്.എൻ.എൽ മുന്നറിയിപ്പുമായി രംഗത്തു വന്നിരിക്കുന്നത്. ഈ മെസേജുകൾ യാഥാർത്ഥമല്ലെന്നും ആരും ഇത്തരത്തിലുള്ള ചതിക്കുഴിയിൽ വീഴരുതെന്നും ബിഎസ്എൻഎൽ മുന്നറിയിപ്പ് നൽകിയിട്ടുണ്ട്.
ഇത്തരത്തിൽ ഒരു നോട്ടീസും പുറത്തുവിട്ടിട്ടില്ലെന്നും സ്വകാര്യ വിവരങ്ങൾ ചോർത്താനുള്ള തട്ടിപ്പുകാരുടെ ശ്രമമാണിതെന്നും ബിഎസ്എൻഎല്ലും പിഐബി ഫാക്റ്റ് ചെക്കും പറഞ്ഞു. അതേസമയം, സംസ്ഥാനത്ത് അതിവേഗ ഇന്റർനെറ്റ് വഴി ടിവി ചാനലുകൾ ലഭ്യമാക്കാൻ ബിഎസ്എൻഎൽ തയ്യാറെടുക്കുകയാണ്.
വടക്കൻ ജില്ലകളിൽ ആരംഭിച്ച പദ്ധതി വിജയമാണെന്ന് കണ്ടതിനെ തുടർന്നാണ് പുതിയ നടപടി. ഒരാഴ്ചയ്ക്കകം നടപ്പാക്കുന്ന ഈ പദ്ധതിപ്രകാരം ഒരു മാസത്തോളം മുഴുവൻ ചാനലുകൾ സൗജന്യമായി നൽകും.
തുടർന്ന് 350 ടിവി ചാനലുകൾ സൗജന്യമായി ലഭിക്കും. ബാക്കിയുള്ളതിന് നിരക്കുകൾ ഈടാക്കുമെന്നാണ് അറിയിപ്പ്. 400 ചാനലുകളാണ് ആകെ ലഭ്യമാകുക. അതിൽ 23 എണ്ണം മലയാളമായിരിക്കും. ഫൈബർ ടു ഹോം കണക്ഷനുള്ളവർക്കാണ് സേവനം ലഭ്യമാകുക.
സ്മാർട്ട് ടിവിയും ഉണ്ടായിരിക്കണം. അൺലിമിറ്റഡ് വോയ്‌സ് കോളും വൈഫൈ റോമിങ്ങും എഫ്ടിടിഎച്ച് കണക്ഷനുള്ളവർക്ക് നിലവിൽ നൽകുന്നുണ്ട്.
