തിരുവനന്തപുരം: നെടുമ്പാശ്ശേരി വിമാനത്താവളത്തിലും റെയിൽവേ സ്റ്റേഷനിലും ബോംബ് ഭീഷണി അയച്ച ഫേസ്ബുക്ക് അക്കൗണ്ട് ഉടമയെ പോലീസ് തിരിച്ചറിഞ്ഞു. തെലങ്കാന സ്വദേശി നുറ്റേറ്റി രാംബാബുവിൻറെ അക്കൗണ്ടിൽ നിന്നാണ് ഭീഷണി സന്ദേശമെത്തിയത്. ഇയാളോട് രണ്ടുദിവസത്തിനകം തമ്പാനൂർ സ്റ്റേഷനിൽ ഹാജരാകാൻ പൊലീസ് നിർദേശം നൽകിയിട്ടുണ്ട്.
നച്ചരത്ത് നിന്നാണ് ഇയാളെ അന്വേഷണ സംഘം കണ്ടെത്തിയത്. ഇയാളിൽ നിന്ന് ഇലക്ട്രോണിക് ഉപകരണങ്ങൾ പിടിച്ചെടുത്തിട്ടുണ്ട്. മൊബൈൽ, ലാപ്ടോപ്പ്, വൈഫൈ ഡോങ്കിൾ എന്നിവയാണ് പോലീസ് പിടിച്ചെടുത്തത്. ഇയാൾ തന്നെയാണ് സന്ദേശം അയച്ചതെന്നാണ് പോലീസിന്റെ സംശയം.
ഫെബ്രുവരി 12നാണ് ബോംബ് ഭീഷണി സന്ദേശം ലഭിച്ചത്. തമ്പാനൂർ റെയിൽവേ സ്റ്റേഷനിലും നെടുമ്പാശ്ശേരി വിമാനത്താവളത്തിലും സ്ഫോടനം നടക്കുമെന്നായിരുന്നു ഭീഷണി എത്തിയത്.
