കോഴിക്കോട്: കോടഞ്ചേരിയിൽ നിന്ന് കാണാതായ വയോധികയെ മരിച്ച നിലയിൽ കണ്ടെത്തി. മംഗലം വീട്ടിൽ ജാനു(75) ആണ് മരിച്ചത്. ഒരാഴ്ച മുൻപാണ് കാണാതായത്.
ഈ മാസം ഒന്നാം തിയതിയാണ് ജാനുവിനെ കാണാതായത്. തുടർന്ന് പോലീസും ഡോഗ് സ്ക്വാഡും നാട്ടുകാരും സന്നദ്ധ സംഘടന പ്രവർത്തകരും തിരച്ചിൽ ആരംഭിച്ചിരുന്നു. ഇന്നലെ വലിയകൊല്ലി പള്ളിക്കുന്നേൽ മലയിൽ കാട്ടിൽ ജാനുവിന്റെ വസ്ത്രങ്ങൾ കണ്ടെത്തിയിരുന്നു. ഇവിടെ താഴെയായിട്ടാണ് അഴുകിയ നിലയിൽ മൃതദേഹം കിടന്നിരുന്നത്.
ജാനുവിന് ഓർമക്കുറവുണ്ടായിരുന്നതായി ഉദ്യോഗസ്ഥർ പറയുന്നു. എങ്ങനെയാണ് ഇവർ ഇവിടെയത്തിയത് എന്നതിൽ വ്യക്തതയില്ല. ഒന്നാം തീയ്യതി മുതല് തന്നെ അന്വേഷണം തുടങ്ങിയെങ്കിലും വിവരമൊന്നും ലഭിച്ചിരുന്നില്ല. കോടഞ്ചേരി പൊലീസിന് പുറമേ അഗ്നിരക്ഷാ സേന, ടാസ്ക് ഫോഴ്സ്, എന്റെ മുക്കം സന്നദ്ധ സേന എന്നിവരും തെരച്ചിലിനായി ഇറങ്ങിയിരുന്നു. ഡ്രോണ് ഉപയോഗിച്ചുള്ള നിരീക്ഷണവും നടത്തിയിരുന്നു.
