ക്ഷേത്രോത്സവ സമയത്ത് തൂക്കുപാലം അടച്ചതിൽ വിവാദം; നാട്ടുകാർക്ക് യാത്രാ തടസ്സം

ക്ഷേത്രോത്സവ സമയത്ത് തൂക്കുപാലം അടച്ചതിൽ വിവാദം; നാട്ടുകാർക്ക് യാത്രാ തടസ്സം

ഇടുക്കി: ഇടുക്കി അയ്യപ്പൻകോവിൽ തൂക്കുപാലത്തിൽ ക്ഷേത്രോത്സവ സമയത്ത് രണ്ടു ദിവസം യാത്രാ നിരോധനം ഏർപ്പെടുത്തിയ ജില്ലാ ഭരണകൂടത്തിന്റെ നടപടിയിൽ വിവാദം ശക്തമാകുന്നു.

ഗുരുതരമായ ബലക്ഷയം നേരിടുന്ന പാലം അറ്റകുറ്റപ്പണി നടത്തി സംരക്ഷിക്കേണ്ടതിന് പകരം, അയ്യപ്പൻകോവിൽ ശ്രീധർമ്മ ശാസ്താ ക്ഷേത്രത്തിലെ ശിവരാത്രി ഉത്സവം പരിഗണിച്ച് ഫെബ്രുവരി 14, 15 തീയതികളിൽ മാത്രം യാത്ര നിരോധിച്ചതാണ് പ്രതിഷേധത്തിന് കാരണമായത്.

അടിമാലിയിൽ കാട്ടുതീ വ്യാപകം; കുരുമുളക്–ഏലം കൃഷികൾ കത്തി, ഏഴ് കുടുംബങ്ങൾക്കു വൻ നഷ്ടം

400-ലധികം കുടുംബങ്ങളുടെ പ്രധാന യാത്രാമാർഗം

കോഴിമല മേഖലയിൽ താമസിക്കുന്ന നാനൂറിലധികം കുടുംബങ്ങളുടെ പ്രധാന യാത്രാ മാർഗമാണ് അയ്യപ്പൻകോവിൽ തൂക്കുപാലം. ഭക്തർ ക്ഷേത്രത്തിലേക്ക് എത്തുന്നതിനും ഈ പാലമാണ് ആശ്രയം.

ഇടുക്കി സംഭരണിയിൽ വെള്ളം നിറയുന്ന ആറുമാസക്കാലത്ത് തൂക്കുപാലം വഴിയല്ലാതെ യാത്ര സാധ്യമല്ലെന്നും നാട്ടുകാർ പറയുന്നു.

ഉത്സവ തിരക്ക് കാരണം അടച്ചതെന്ന് ജില്ലാ ഭരണകൂടം

ശിവരാത്രി ദിനത്തിൽ കൂടുതൽ ആളുകൾ എത്തുന്ന സാഹചര്യത്തിലാണ് പാലം അടച്ചതെന്ന് ജില്ലാ ഭരണകൂടം വിശദീകരിക്കുന്നു.

എന്നാൽ ഇത് ജില്ലയിലെ പ്രധാന വിനോദസഞ്ചാര കേന്ദ്രം കൂടിയായതിനാൽ നടപടി അനാവശ്യ തടസ്സമാകുന്നുവെന്ന് നാട്ടുകാർ ചൂണ്ടിക്കാട്ടുന്നു.

ടൂറിസം കേന്ദ്രവും സിനിമാ ലൊക്കേഷനും

അയ്യപ്പൻകോവിൽ തൂക്കുപാലം വിനോദസഞ്ചാരികൾക്കിടയിൽ ഏറെ പ്രശസ്തമാണ്. ഓസ്‌കർ അവാർഡിലേക്കുള്ള ഇന്ത്യയുടെ ഔദ്യോഗിക എൻട്രിയായിരുന്ന ‘ജെല്ലിക്കെട്ട്’ ഉൾപ്പെടെ നിരവധി സിനിമകൾ ഇവിടെ ചിത്രീകരിച്ചിട്ടുണ്ട്.

നൂറുകണക്കിന് വിനോദസഞ്ചാരികളാണ് ദിനംപ്രതി ഇവിടെ എത്തുന്നത്. ഒരേസമയം നൂറിലധികം പേർ പാലത്തിൽ കയറുന്ന സാഹചര്യം പതിവാണെന്നും നാട്ടുകാർ പറയുന്നു.

സുരക്ഷാ ജീവനക്കാരെ നിയമിക്കണമെന്ന ആവശ്യം പരിഗണിച്ചില്ല

ആളുകളെ നിയന്ത്രിക്കാൻ സുരക്ഷാ ജീവനക്കാരെ നിയോഗിക്കണമെന്ന നാട്ടുകാരുടെ ആവശ്യം ജില്ലാ ഭരണകൂടം ഇതുവരെ പരിഗണിച്ചിട്ടില്ലെന്ന് ആരോപണമുണ്ട്.

ഭാഗ്യം കൊണ്ടാണ് ഇതുവരെ വലിയ അപകടം ഒഴിവായതെന്നും നാട്ടുകാർ പറയുന്നു.

2012-ൽ നിർമാണം, പിന്നീട് അറ്റകുറ്റപ്പണി ഇല്ല

2012-13 കാലഘട്ടത്തിൽ ജില്ലാ റിവർ മാനേജ്‌മെന്റാണ് 2.5 കോടി രൂപ ചെലവിട്ട് കാഞ്ചിയാർ–അയ്യപ്പൻകോവിൽ പഞ്ചായത്തുകളെ ബന്ധിപ്പിച്ച് ഇടുക്കി ജലാശയത്തിന് മുകളിലൂടെ 200 മീറ്റർ നീളത്തിലും 1.20 മീറ്റർ വീതിയിലും തൂക്കുപാലം നിർമ്മിച്ചത്. എന്നാൽ പിന്നീട് കാര്യമായ അറ്റകുറ്റപ്പണി നടന്നിട്ടില്ല.

ബലക്ഷയം റിപ്പോർട്ടുകളും പദ്ധതികളും ഉപേക്ഷിച്ചു

2019-ൽ പാലത്തിന് ബലക്ഷയമുണ്ടെന്ന് വില്ലേജ് ഓഫീസർ റിപ്പോർട്ട് നൽകി.
നവീകരണ രൂപരേഖ തയ്യാറാക്കാൻ സിൽക്ക് അക്രഡിറ്റഡ് ഏജൻസിയെ ചുമതലപ്പെടുത്തി. എന്നാൽ 3 ലക്ഷം രൂപയുടെ എസ്റ്റിമേറ്റ് തുക ഇല്ലെന്ന് പറഞ്ഞ് പദ്ധതി ഉപേക്ഷിച്ചു.

2023-ൽ ഡി.ടി.പി.സി. എക്‌സിക്യൂട്ടീവ് കമ്മിറ്റിയുടെ നേതൃത്വത്തിൽ 13 ലക്ഷം രൂപയുടെ എസ്റ്റിമേറ്റ് തയ്യാറാക്കി സംസ്ഥാന റിവർ മാനേജ്‌മെന്റിന് നൽകി. എന്നാൽ സാമ്പത്തിക പ്രതിസന്ധി ചൂണ്ടിക്കാട്ടി ശുപാർശ അംഗീകരിച്ചില്ല.

40 പേരിൽ കൂടുതൽ കയറരുതെന്ന് ബോർഡ് മാത്രം

ഒരേ സമയം 40 പേരിൽ കൂടുതൽ പാലത്തിൽ കയറരുതെന്ന് മുന്നറിയിപ്പ് ബോർഡ് സ്ഥാപിച്ച് അധികൃതർ കൈ ഒഴിഞ്ഞുവെന്നാണ് ആരോപണം.

ഇത് ലംഘിക്കുന്നുണ്ടോ എന്ന് പരിശോധിക്കാൻ പോലും നടപടി സ്വീകരിച്ചിട്ടില്ലെന്നും നാട്ടുകാർ പറയുന്നു.

English Summary:

A controversy has erupted in Idukki after the district administration imposed a two-day travel ban on the Ayyappankovil hanging bridge during the Shivaratri temple festival. Locals argue that the bridge, which serves as the main route for over 400 families and pilgrims, requires urgent repairs rather than temporary closure. Residents have also criticized authorities for neglecting maintenance despite repeated warnings about structural weakness.