തൃശൂർ: തിളച്ച കഞ്ഞിയിൽ ഭാര്യയുടെ തല മുക്കി കൊല്ലാൻ ശ്രമിച്ച ഭർത്താവിനെ അറസ്റ്റ് ചെയ്തു. തൃശൂർ കുറ്റിച്ചിറ വെട്ടിക്കുഴി പുലികുന്നേല്‍ വീട്ടില്‍ ഡെറിനെ(30)യാണ് അറസ്റ്റ് ചെയ്തത്. വെള്ളിക്കുളങ്ങര പൊലീസ് ആണ് ഇയാളെ അറസ്റ്റ് ചെയ്തത്.
സ്വന്തം വീട്ടിലേക്ക് പോകണമെന്ന് ഭാര്യ ആവശ്യപ്പെട്ടതിനാണ് ഡെറിൻ ആക്രമണം നടത്തിയത്. മദ്യപിച്ചെത്തിയ പ്രതി ഭാര്യയെ ആക്രമിക്കുകയും മുഖത്തടിക്കുകയും ചെയ്തിരുന്നു. പിന്നാലെയാണ് കഴുത്ത് ഞെക്കിപ്പിടിച്ച് അടുക്കളയിലേക്ക് വലിച്ചിഴച്ച് കൊണ്ടുപോയി തിളച്ച കഞ്ഞിയിലേക്ക് തല മുക്കിപ്പിടിച്ച് കൊല്ലാന്‍ ശ്രമിച്ചത്.
ഗുരുതരമായി പരിക്കേറ്റ യുവതി ചാലക്കുടി താലൂക്ക് ആശുപത്രിയില്‍ ചികിത്സയിൽ തുടരുകയാണ്. സംഭവത്തിന് പിന്നാലെ ഒളിവില്‍പോയ ഡെറിനെ ചായ്പ്പന്‍കുഴിയില്‍ നിന്നാണ് പൊലീസ് പിടികൂടിയത്.
