തിരുവനന്തപുരം ബാലരാമപുരത്ത് കഴിഞ്ഞ ദിവസമുണ്ടായ രണ്ടര വയസ്സുകാരിയുടെ മരണവുമായി ബന്ധപ്പെട്ട് ജോത്സ്യനെ പോലീസ് കസ്റ്റഡിയിലെടുത്തു. കുടുംബത്തിന് പല കാര്യങ്ങളിലും ഉപദേശം നൽകിയിരുന്നത് ഇയാളാണ് എന്ന വിവരത്തിന്റെ അടിസ്ഥാനത്തിലാണ് പോലീസ് നടപടി. Astrologer in custody for murder of two-year-old girl
കരിക്കകം സ്വദേശി ശംഖുമുഖം ദേവീദാസ് എന്നയാളെയാണ് പോലീസ് കസ്റ്റഡിയിൽ എടുത്തിട്ടുള്ളത്. കുടുംബത്തിന്റെ ഏതെങ്കിലും തരത്തിലുള്ള അന്ധവിശ്വാസം കുഞ്ഞിന്റെ മരണവുമായി ബന്ധപ്പെട്ട് ഉണ്ടോ എന്ന് അന്വേഷിക്കുന്നതിനായാണ് ജ്യോത്സ്യനെ കസ്റ്റഡിയിൽ എടുത്തത്.
ബാലരാമപുരത്ത് വാടകയ്ക്ക് താമസിക്കുന്ന ശ്രീതു ശ്രീജിത്ത് ദമ്പതികളുടെ മകൾ രണ്ടര വയസ്സ് കാരിയെ വ്യാഴാഴ്ച രാവിലെയാണ് വീട്ടുമുറ്റത്തെ കിണറ്റിൽ മരിച്ച നിലയിൽ കണ്ടെത്തുന്നത്. വീട്ടിൽ ഉറങ്ങിക്കിടന്ന കുഞ്ഞിനെ കാണാതായതിനെ തുടർന്ന് വെളുപ്പിനെ നടത്തിയ തിരച്ചിലിന് ഒടുവിൽ ആണ് കിണറിനുള്ളിൽ കുഞ്ഞിന്റെ മൃതദേഹം കണ്ടെത്തുന്നത്. സംഭവത്തിൽ ശ്രീതുവിന്റെ സഹോദരൻ ഹരികുമാർ ഒടുവിൽ കുറ്റം സമ്മതിക്കുകയായിരുന്നു.
ഇതിനിടെ കുട്ടിയുടെ മരണവുമായി ബന്ധപ്പെട്ട് മറ്റാർക്കെങ്കിലും പങ്കുണ്ടോ എന്ന കാര്യവും പോലീസ് അന്വേഷിക്കുന്നുണ്ട്. കുഞ്ഞിന്റെ അമ്മ ശ്രീജുവിന് കുറ്റകൃത്യത്തിൽ പങ്കുണ്ടോ എന്നുള്ളത് അടക്കമുള്ള കാര്യങ്ങളാണ് അന്വേഷിക്കുന്നത്. എന്നാൽ നിലവിൽ അമ്മയെ പ്രതിചേർക്കാൻ ആയുള്ള തെളിവുകൾ ഒന്നും പോലീസിന് ലഭിച്ചിട്ടില്ല.
കുടുംബത്തിന് വലിയ സാമ്പത്തിക ബാധ്യത ഉണ്ടായിരുന്നു എന്നാണ് ഇപ്പോൾ പുറത്തുവരുന്ന വിവരം. ലക്ഷക്കണക്കിന് രൂപയുടെ സാമ്പത്തിക ബാധ്യത കുടുംബത്തിന് ഉണ്ടായിരുന്നു എന്നത് പോലീസ് സ്ഥിരീകരിക്കുന്നു. ഇതും അന്ധവിശ്വാസവുമായി ബന്ധപ്പെട്ട മറ്റേതെങ്കിലും കാര്യങ്ങളും കുഞ്ഞിന്റെ മരണത്തിലേക്ക് നയിച്ചിട്ടുണ്ടോ എന്നതാണ് പോലീസ് പരിശോധിക്കുന്നത്.
