കൊച്ചി: ഉത്സവത്തിനിടെ പെൺകുട്ടികളോട് മോശമായി പെരുമാറിയവർക്കെതിരെ പ്രതികരിച്ച് നടി അനുശ്രീ. നാട്ടിലെ ഉത്സവത്തിന് സംഘടിപ്പിച്ച ഗാനമേളയ്ക്ക് പെൺകുട്ടികൾ കൈയടിച്ച് ആഘോഷിച്ചത് ചോദ്യം ചെയ്ത പുരുഷൻമാരോട് തർക്കിക്കുന്ന പെൺകുട്ടികളുടെ വീഡിയോ സോഷ്യൽ മീഡിയയിൽ ചർച്ചയായതിനു പിന്നാലെയാണ് പെൺകുട്ടികൾക്ക് പിന്തുണ അറിയിച്ച് അനുശ്രീ രംഗത്തെത്തിയത്.
കഴിഞ്ഞ മാർച്ച് ഒമ്പതിനായിരുന്നു അനുശ്രീ ഈ വീഡിയോ ഇൻസ്റ്റഗ്രാമിൽ പങ്കുവെച്ചത്. എന്നാൽ അനുശ്രീ കമന്റ് ചെയ്തത് കഴിഞ്ഞ ദിവസമാണ്. ‘ഉത്സവം, ഗുണ്ടായിസം. ഇത് എന്റെ നാട്ടിൽ മാർച്ച് നാലിന് നടന്ന സംഭവമാണ്.
മാന്യമായ രീതിയിൽ ഗാനമേള ആസ്വദിച്ചുകൊണ്ട് നിന്ന ഞങ്ങളോട് വളരെ മോശമായ രീതിയിൽ സംസാരിക്കുകയും ‘വീട്ടിൽ പോയി നിരങ്ങാനും’ ആണ് പറഞ്ഞത്.
സ്പോട്ടിൽ തന്നെ പ്രതികരിക്കുകയും പോലീസ് ഇടപെട്ട് ഇവരെ അവിടെ നിന്ന് മാറ്റുകയും ചെയ്തു.’ ഇൻസ്റ്റഗ്രാമിൽ പങ്കുവെച്ച വീഡിയോയ്‌ക്കൊപ്പം ഈ കുറിപ്പും പോസ്റ്റ് ചെയ്തിരുന്നു.
പെൺകുട്ടികൾ കൈയടിച്ച് ഡാൻസ് ചെയ്തപ്പോൾ ‘ഇതൊന്നും ഇവിടെ നടക്കില്ല, വീട്ടിൽ പോയി ആഘോഷിച്ചാൽ മതി’ എന്ന അർഥത്തിൽ മോശമായ രീതിയിൽ ആളുകൾ സംസാരിക്കുകയായിരുന്നു.
ഞങ്ങൾ ആഘോഷിച്ചാൽ എന്താണ് കുഴപ്പമെന്ന് പെൺകുട്ടികൾ തിരിച്ചു ചോദിക്കുന്നതും വീഡിയോയിൽ കാണാം. ‘പറഞ്ഞത് അത്രയും പോരായിരുന്നു, അത്രയുമെങ്കിലും പറഞ്ഞത് നന്നായി’ എന്നാണ് ഈ വീഡിയോയ്ക്ക് താഴെ അനുശ്രീ കമന്റ് ചെയ്തത്.
