നടിയെ ആക്രമിച്ച കേസ്: ആദ്യ മൊഴിയില് ദിലീപിനെക്കുറിച്ച് പരാമര്ശമില്ല; ഗൂഢാലോചന കുറ്റം തെളിയാതെ പോയതിന് പിന്നില്
കൊച്ചി ∙ നടിയെ ആക്രമിച്ച കേസില് അതിജീവിതയുടെ ആദ്യ മൊഴിയില് എട്ടാം പ്രതിയായ ദിലീപിനെതിരെ യാതൊരു പരാമര്ശവും ഉണ്ടായിരുന്നില്ലെന്ന് കോടതി വ്യക്തമാക്കി.
ലൈംഗികാതിക്രമ കേസുകളില് സാധാരണഗതിയില് അതിജീവിതയുടെ മൊഴിക്ക് നല്കുന്ന മുന്തൂക്കം, ദിലീപിനെതിരായ ഗൂഢാലോചനക്കുറ്റത്തില് ബാധകമാക്കാനാകില്ലെന്നും കോടതി നിരീക്ഷിച്ചു.
കുറ്റകൃത്യത്തില് ദിലീപിന്റെ പങ്കാളിത്തം കണ്ടെത്തിയത് പൊലീസാണെന്നും, അന്വേഷണത്തിന്റെ അടിസ്ഥാനത്തിലാണ് ദിലീപിനെ അറസ്റ്റ് ചെയ്തതെന്നും കോടതി പറഞ്ഞു.
എന്നാല് ദിലീപും ഒന്നാം പ്രതി പള്സര് സുനിയും തമ്മില് ഗൂഢാലോചന നടത്തിയെന്ന കുറ്റം സംശയാതീതമായി തെളിയിക്കാന് പ്രോസിക്യൂഷന് കഴിഞ്ഞില്ലെന്ന് വിധിന്യായത്തില് കോടതി വ്യക്തമാക്കി.
ദിലീപില് നിന്ന് ഒന്നാം പ്രതി പണം കൈപ്പറ്റിയെന്നതിന് തെളിവില്ല. ജയിലിലേക്ക് ഫോണ് എത്തിച്ചതും അതിലൂടെ പണത്തിനായി നാദിര്ഷയെ ബന്ധപ്പെട്ടതുമുള്പ്പെടെയുള്ള ആരോപണങ്ങളില് വ്യക്തതയില്ല.
പള്സര് സുനി എഴുതിയതായി പറയുന്ന കത്ത് സുനിയുടെ കൈയക്ഷരമല്ലെന്നും കോടതി കണ്ടെത്തി. ഇതെല്ലാം കണക്കിലെടുത്ത്, സുനിയുമായി ദിലീപിന് നേരിട്ടുള്ള ബന്ധമുണ്ടെന്ന വാദത്തിന് മതിയായ തെളിവില്ലെന്ന് കോടതി ചൂണ്ടിക്കാട്ടി.
ദിലീപും സുനിയും ഒരേ ടവര് ലൊക്കേഷനുകളില് ഉണ്ടായിരുന്നെന്ന പ്രോസിക്യൂഷന് വാദം മാത്രം ഗൂഢാലോചന തെളിയിക്കാന് പര്യാപ്തമല്ലെന്നും കോടതി വ്യക്തമാക്കി.
2017 ഫെബ്രുവരി 17ന് ഷൂട്ടിംഗിനായി തൃശ്ശൂരില് നിന്ന് എറണാകുളത്തേക്ക് യാത്ര ചെയ്യുന്നതിനിടെയാണ് നടിയെ തട്ടിക്കൊണ്ടുപോയി അപകീര്ത്തികരമായ ദൃശ്യങ്ങള് പകര്ത്തിയതെന്ന കേസ്.
ഈ കേസില് ഗൂഢാലോചന ആരോപണത്തില് എട്ടാം പ്രതിയായിരുന്ന ദിലീപ് ഉള്പ്പെടെ നാല് പേരെ തെളിവില്ലെന്ന കാരണത്താല് കോടതി വെറുതെവിട്ടു.
English Summary
The court observed that the survivor did not mention actor Dileep in her initial statement in the actress assault case. It clarified that while survivor testimony usually carries weight in sexual assault cases, it cannot be extended to the conspiracy charge against Dileep.
The court ruled that the prosecution failed to prove conspiracy between Dileep and the prime accused Pulsar Suni, citing lack of evidence regarding money transfer, jail phone access, alleged letters, and tower location data. As a result, Dileep and three others were acquitted due to insufficient evidence.
actress-assault-case-court-on-dileep-acquittal-details
Actress Assault Case, Dileep Acquittal, Kerala Court Verdict, Criminal Conspiracy, Pulsar Suni, Kerala News, Court Observation
