ശബരിമല: നടൻ മോഹൻലാൽ ശബരിമല ദർശനം നടത്തി. മമ്മൂട്ടിയുടെ പേരിൽ ഉഷ:പൂജ വഴിപാടും നടത്തിയാണ് മടങ്ങിയത്.
മോഹൻലാലിനെ സംബന്ധിച്ച് ജേഷ്ഠൻ തന്നെയാണ് നടൻ മമ്മൂട്ടി, ഏറ്റവും പ്രിയപ്പെട്ട ഇച്ചാക്ക. അകാലത്തിൽ മോഹൻലാലിനെ വിട്ടുപിരിഞ്ഞ ചേട്ടൻ പ്യാരിലാലിനോളം തന്നെ പ്രിയപ്പെട്ട സഹോദരനാണ്.
മമ്മൂട്ടിയെ സംബന്ധിച്ചും കാര്യങ്ങൾ അങ്ങനെയൊക്കെ തന്നെയാണ്. തന്റെ അനിയനെ പോലെ തന്നെ മമ്മൂട്ടി ജീവിതത്തിലേക്ക് ചേർത്തു നിർത്തുന്ന കുഞ്ഞനിയനാണ് ലാൽ.
സൂപ്പർസ്റ്റാർ പദവികൾക്കു അപ്പുറം, ഇരുവരും പങ്കിടുന്ന ഊഷ്മളമായ സൗഹൃദത്തിനും സാഹോദര്യത്തിനും പലകുറി മലയാളികൾ ഒരോരുത്തരും സാക്ഷികളായതാണ്.
ഇപ്പോഴിതാ, ഇരുവർക്കുമിടയിലെ ആ ആത്മബന്ധവും അടുപ്പവുമാണ് വീണ്ടും വാർത്തകളിൽ ഇടം പിടിക്കുന്നത്. കുറച്ചു ദിവസങ്ങളായി വിശ്രമത്തിൽ കഴിയുന്ന മമ്മൂട്ടിയ്ക്കു വേണ്ടി ശബരിമലയിൽ വഴിപാട് നടത്തിയിരിക്കുകയാണ് മോഹൻലാൽ.
മുഹമ്മദ് കുട്ടി, വിശാഖം നക്ഷത്രത്തിലായിരുന്നു വഴിപാട് നടത്തിയത്. തന്റെ ഭാര്യ സുചിത്രയുടെ പേരിലും വഴിപാട് നടത്തി.
ഇന്നലെ വൈകിട്ട് സുഹൃത്തുക്കൾക്കൊപ്പമാണ് എത്തിയത്. ‘എമ്പുരാൻ’ റിലീസ് ചെയ്യാൻ ദിവസങ്ങൾ ശേഷിക്കെയാണ് അയ്യപ്പ ദർശനം.
പമ്പയിലെത്തി ഇരുമുടി നിറച്ച ശേഷമായിരുന്നു മലകയറ്റം. ഒന്നര മണിക്കൂർ കൊണ്ട് സന്നിധാനത്തെത്തി. ദർശനം നടത്തിയ ശേഷം തന്ത്രിയെ കണ്ടും.
ദേവസ്വം എക്സിക്യൂട്ടീവ് അംഗങ്ങളടക്കം മോഹൻലാലിനൊപ്പം ഉണ്ടായിരുന്നു. ഇന്ന് രാവിലെ നിർമ്മാല്യം തൊഴുത ശേഷമാണി മലയിറങ്ങിയത്.
