കോഴിക്കോട്: വിനോദയാത്രക്കിടെ യുവാവ് കൊക്കയില് വീണ് മരിച്ചു. താമരശ്ശേരി ചുരം ഒന്പതാം വളവിന് സമീപം വെച്ചാണ് അപകടമുണ്ടായത്. വയനാട്ടിലേക്കുള്ള വിനോദയാത്രയ്ക്കിടെയാണ് ദാരുണ സംഭവം നടന്നത്.
വടകര വളയം തോടന്നൂര് വരക്കൂര് സ്വദേശിയായ അമല് (23) ആണ് മരിച്ചത്. ഇന്ന് പുലര്ച്ചെ ഒന്നരയോടെയാണ് അപകടം ഉണ്ടായത്. വയനാട് ഭാഗത്തേക്ക് ട്രാവലറിൽ പോകുന്നതിനിടെ മൂത്രമൊഴിക്കാനായി ഇറങ്ങിയ സമയത്ത് കാല് തെന്നി അബദ്ധത്തില് കൊക്കയിലേക്ക് വീഴുകയായിരുന്നു. കോഴിക്കോട്ടെ സ്വകാര്യ സ്ഥാപനത്തില് ഡ്രൈവറായി ജോലി ചെയ്യുകയാണ് അമൽ. ഇവിടെയുള്ള സഹപ്രവര്ത്തകര്ക്കൊപ്പമാണ് വയനാട്ടിലേക്ക് വിനോദയാത്ര പുറപ്പെട്ടത്.
അമല് അടക്കം 13 പേരാണ് വിനോദയാത്രയിൽ ഉണ്ടായിരുന്നത്. കല്പ്പറ്റയില് നിന്നെത്തിയ ഫയര്ഫോഴ്സ് സംഘമാണ് അമലിനെ കൊക്കയില് നിന്നും പുറത്തെടുത്തത്. ഉടന് തന്നെ ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു.
