കര്ണാടകയില് ഹീലിയം ഗ്യാസ് സിലിണ്ടര് പൊട്ടിത്തെറിച്ച് അപകടം
ബെംഗളൂരു: കര്ണാടകയില് ഹീലിയം ബലൂണുകള് നിറയ്ക്കാന് ഉപയോഗിക്കുന്ന ഹീലിയം ഗ്യാസ് സിലിണ്ടര് പൊട്ടിത്തെറിച്ചുണ്ടായ അപകടത്തില് ഒരാള് മരിച്ചു.
അഞ്ചുപേര്ക്ക് പരിക്കേറ്റു. മൈസൂര് കൊട്ടാരത്തിന് സമീപമുള്ള ജയമാര്ത്താണ്ഡ ഗേറ്റിന് മുന്നില് കഴിഞ്ഞ രാത്രി എട്ട് മുപ്പതിനോടെയായിരുന്നു അപകടം നടന്നത്.
പ്രദേശത്ത് സഞ്ചാരികളും നാട്ടുകാരും വലിയ തോതില് ഉണ്ടായിരുന്ന സമയത്താണ് സിലിണ്ടര് പൊട്ടിത്തെറിച്ചത്, ഇത് വലിയ പരിഭ്രാന്തിക്ക് കാരണമായി.
ഉത്തര്പ്രദേശിലെ കനൗജ് സ്വദേശിയായ സലീം (40) ആണ് അപകടത്തില് മരിച്ചത്. ബലൂണ് വില്പ്പനയിലൂടെ ജീവിതം നയിച്ചിരുന്ന സലീം, ഹീലിയം സിലിണ്ടര് ഉപയോഗിച്ച് ബലൂണുകള് നിറയ്ക്കുന്നതിനിടെയാണ് അപകടം
സിലിണ്ടര് ശക്തമായി പൊട്ടിത്തെറിച്ചതോടെ സലീമിന് ഗുരുതര പരിക്കേറ്റു. ഉടന് തന്നെ അദ്ദേഹം സംഭവസ്ഥലത്ത് തന്നെ മരണമടഞ്ഞതായി പൊലീസ് അറിയിച്ചു.
അപകടത്തില് സലീമിനൊപ്പം സമീപത്തുണ്ടായിരുന്ന അഞ്ച് പേര്ക്കാണ് പരിക്കേറ്റത്. ഷെഹനാസ് ഷബീര് (54), ലക്ഷ്മി (45), കൊട്രേഷ് ഗുട്ടെ (54), മഞ്ജുള നഞ്ചന്ഗുഡ് (29), രഞ്ജിത (30) എന്നിവരാണ് പരിക്കേറ്റവര്.
സിലിണ്ടര് പൊട്ടിത്തെറിച്ചതോടെ ചുറ്റുമുണ്ടായിരുന്നവര്ക്ക് ദേഹത്തും മുഖത്തും പരിക്കേറ്റതായി ആശുപത്രി വൃത്തങ്ങള് അറിയിച്ചു.
ഇവരെ ഉടന് തന്നെ സമീപത്തെ ആശുപത്രികളില് പ്രവേശിപ്പിച്ച് ചികിത്സ നല്കി വരികയാണ്. ആരുടെയും നില അതീവ ഗുരുതരമല്ലെന്നാണ് ലഭ്യമായ വിവരം.
സംഭവത്തിന് പിന്നാലെ പൊലീസ് സ്ഥലത്തെത്തി പ്രദേശം നിയന്ത്രണവിധേയമാക്കി. അപകടം നടന്ന സ്ഥലത്ത് കുറച്ചുസമയം ഗതാഗതം നിയന്ത്രിക്കുകയും സഞ്ചാരികളെ മാറ്റി നിര്ത്തുകയും ചെയ്തു.
സിലിണ്ടര് പൊട്ടിത്തെറിക്കാന് കാരണമായത് സാങ്കേതിക തകരാറാണോ, അതോ സുരക്ഷാ മാനദണ്ഡങ്ങള് പാലിക്കാത്തതാണോ എന്നതടക്കമുള്ള കാര്യങ്ങള് പൊലീസ് വിശദമായി അന്വേഷിച്ചുവരികയാണ്.
പൊതുജനങ്ങള് കൂടുതലായി എത്തിച്ചേരുന്ന സ്ഥലങ്ങളില് ഹീലിയം സിലിണ്ടറുകള് ഉപയോഗിക്കുമ്പോള് ആവശ്യമായ സുരക്ഷാ മുന്കരുതലുകള് നിര്ബന്ധമായും പാലിക്കണമെന്ന് അധികൃതര് മുന്നറിയിപ്പ് നല്കി.
സംഭവത്തില് കേസ് രജിസ്റ്റര് ചെയ്ത പൊലീസ് വിശദമായ അന്വേഷണം തുടരുകയാണ്.
