കെകെ റോഡിൽ ബസേലിയസ് കോളജിനു സമീപം അമിതവേഗത്തിൽ എത്തിയ സ്വകാര്യ ബസ് ബൈക്ക് യാത്രികനെ ഇടിച്ചുവീഴ്ത്തി. ഇടിയുടെ ആഘാതത്തിൽ ബസിനടിയിൽ കുടുങ്ങിയ ബൈക്കുമായി ഏതാനും ദൂരം നിരങ്ങി നീങ്ങിയ ശേഷമാണ് ബസ് നിന്നത്.A speeding private bus in Kottayam hits a biker: seriously injured

ചൊവ്വാഴ്ച രാവിലെ ഏഴരയോടെയായിരുന്നു അപകടം.
അപകടത്തിൽ വടവാതൂർ സ്വദേശിയും കഞ്ഞിക്കുഴിയിൽ പ്രവർത്തിക്കുന്ന സ്വകാര്യ ഗൃഹോപകരണ സ്ഥാപനത്തിലെ സെക്യൂരിറ്റി ജീവനക്കാരനുമായ ജോയി (54) ആണ് അപകടത്തിൽപ്പെട്ടത്.

ഈരയിൽ കടവ് ഭാഗത്ത് നിന്നും കെകെ റോഡിലേക്ക് പ്രവേശിച്ച ബൈക്കിനെ ലോഗോസ് ജംക്‌ഷൻ ഭാഗത്തുനിന്നും അമിതവേഗത്തിൽ എത്തിയ ബസ് ഇടിക്കുകയായിരുന്നു.

സമീപത്തുണ്ടായിരുന്ന നാട്ടുകാർ ചേർന്ന് പരുക്കേറ്റ ജോയിയെ പുറത്തെടുത്ത് ജനറൽ ആശുപത്രിയിൽ പ്രവേശിപ്പിച്ചു. ഗുരുതരമായി പരുക്കേറ്റ് അബോധാവസ്ഥയിലായ ജോയിയെ പ്രഥമ ശുശ്രൂഷകൾ നൽകിയശേഷം മെഡിക്കൽ കോളജ് ആശുപത്രിയിലേക്ക് മാറ്റി.

കോട്ടയം – ഏറ്റുമാനൂർ റൂട്ടിൽ സർവീസ് നടത്തുന്ന സ്വകാര്യ ബസാണു അപകടത്തിനിടയാക്കിയത്.