തേക്ക് കടപുഴകി സ്കൂള് ബസ്സിന് മുകളിലേക്ക് വീണു
കോഴിക്കോട്: കഴിഞ്ഞ ദിവസമുണ്ടായ ശക്തമായ കാറ്റില് ഭീമന് തേക്ക് സ്കൂള് ബസ്സിന് മുകളിലേക്ക് കടപുഴകി വീണ് അപകടം. കോഴിക്കോട് മീഞ്ചന്തയിൽ ഇന്നലെ വൈകീട്ടോടെയാണ് അപകടമുണ്ടായത്.
അപകടത്തില് റോഡരികില് നിര്ത്തിയിട്ടിരുന്ന സ്കൂള് ബസ്സും സ്കൂട്ടറും തകർന്നു. അതേസമയം ആര്ക്കും പരിക്കേറ്റില്ല.
മീഞ്ചന്തയിലെ ഗവ. ആര്ട്സ് ആന്റ് സയന്സ് കോളേജ് കോംപൗണ്ടിലെ തേക്ക് മരമാണ് കടപുഴകി വീണത്.
പാവങ്ങാട് ഇഎംഎസ് സ്കൂളിലെ ബസ്സിന് മുകളിലേക്കാണ് മരം പതിച്ചത്. സംഭവ സമയത്ത് ഈ മരത്തിന് തൊട്ടടുത്തായി പ്രവര്ത്തിച്ചിരുന്ന പെട്ടിക്കടയില് ആളുകളുണ്ടായിരുന്നു. തലനാരിഴയ്ക്കാണ് ഇവര് അപകടത്തില് നിന്ന് രക്ഷപ്പെട്ടത്.
സ്കൂൾ ബസ്സ് റോഡരികില് നിര്ത്തിയിട്ടതായിരുന്നു. ഇതിന് സമീപത്തായി നിര്ത്തിയിട്ടിരുന്ന പെട്ടിക്കടക്കാരന്റെ സ്കൂട്ടറും തകർന്നു.
അപകടത്തെ തുടർന്ന് മീഞ്ചന്ത അഗ്നിരക്ഷാ സേനാംഗങ്ങള് എത്തി മരം മുറിച്ചുമാറ്റിയ ശേഷമാണ് ഇതുവഴിയുള്ള ഗതാഗതം പുനസ്ഥാപിച്ചത്.
മഴക്കെടുതിയിൽ രണ്ടു മരണം
തൊടുപുഴ: കനത്ത കാറ്റിൽ മരം ഒടിഞ്ഞു വീണ് സംസ്ഥാനത്ത് രണ്ടു മരണം . ഇന്നലെ ഇടുക്കി ചക്കുപള്ളം എസ്ടിബി എസ്റ്റേറ്റിൽ ജോലി ചെയ്യുന്ന തൊഴിലാളിയുടെ മുകളിലേക്ക് മരത്തിന്റെ ശിഖരം ഒടിഞ്ഞു വീണ് കമ്പം ഗൂഡല്ലൂർ സ്വദേശിനി സുധ(50) മരിച്ചു.
മൃതദേഹം പുറ്റടി ഗവൺമെന്റ് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.
മറ്റൊരു സ്ത്രീക്ക് ചെറിയ പരിക്കുകളോടെ കമ്പത്ത് സ്വകാര്യ ആശുപത്രിയിലേക്ക് കൊണ്ടുപോയി.
ശനിയാഴ്ച പുലർച്ച കണ്ണൂരിൽ വീടിന് മുകളിൽ മരം പൊട്ടി വീണ് വയോധികൻ മരിച്ചു. കണ്ണൂർ കോളയാട് പെരുവ തെറ്റുമ്മലിലെ എനിയാടൻ ചന്ദ്രനാണ് (78) മരിച്ചത്. പുലർച്ചെ രണ്ട് മണിയോടെയാണ് സംഭവം.
ചുഴലിക്കാറ്റിൽ പ്രദേശത്ത് വ്യാപക നാശ നഷ്ടമുണ്ടായിട്ടുണ്ട്. പാറക്കുണ്ട് ഉന്നതിയിലെ രജീഷിന്റെയും തെറ്റുമ്മലിലെ മാതുവിന്റെയും വീടുകൾ മരങ്ങൾ വീണ് തകർന്നു.
പ്രദേശത്തേക്കുള്ള റോഡിൽ കൂറ്റൻ മരം പൊട്ടി വീണ് ഗതാഗതവും തടസപ്പെട്ട നിലയിലാണ്.
അതിശക്തമായ മഴ തുടരും; ഇന്ന് എല്ലാ ജില്ലകളിലും ജാഗ്രത നിർദേശം
തിരുവനന്തപുരം: സംസ്ഥാനത്ത് അതിശക്തമായ മഴ തുടരുമെന്ന് മുന്നറിയിപ്പ്. പശ്ചിമ ബംഗാളിന്റെ തീരത്തിന് മുകളിലും വടക്കു പടിഞ്ഞാറൻ ബംഗാൾ ഉൾക്കടലിനും മുകളിലുമായി തീവ്രന്യൂനമർദം സ്ഥിതിചെയ്യുന്ന സാഹചര്യത്തിൽ മഴ തുടരുമെന്നാണ് കേന്ദ്ര കാലാവസ്ഥ വകുപ്പിന്റെ പ്രവചനം.
ഇന്ന് സംസ്ഥാനത്തെ എല്ലാ ജില്ലകളിലും മഴ മുന്നറിയിപ്പുണ്ട്. പത്തനംതിട്ട, കോട്ടയം, എറണാകുളം, ഇടുക്കി, തൃശ്ശൂർ, പാലക്കാട്, മലപ്പുറം ജില്ലകളിൽ ഇന്ന് ഓറഞ്ച് അലർട്ടുണ്ട്. മറ്റ് ജില്ലകളിൽ യെല്ലോ അലേർട്ടാണ്. കേരളാ തീരത്ത് 60 കി.മീ വരെ വേഗത്തിൽ കാറ്റ് വീശിയേക്കും.
അതേ സമയം മത്സ്യബന്ധനത്തിനുള്ള വിലക്ക് തുടരുകയാണ്. തൊഴിലാളികൾ ജാഗ്രത പാലിക്കണം. കേരള തീരത്ത് ഉയർന്ന തിരമാലകൾക്ക് സാധ്യതയുണ്ട്.
കേരളത്തിൽ അടുത്ത 5 ദിവസം മഴയ്ക്ക് സാധ്യതയെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്.
സംസ്ഥാനത്തിൻ്റെ അന്തരീക്ഷത്തിൽ പടിഞ്ഞാറൻ – വടക്ക് പടിഞ്ഞാറൻ കാറ്റ് ശക്തമാണ്. മലയോരമേഖലകളിൽ ഉള്ളവർ ജാഗ്രത പുലർത്തണം.
മഴ തുടരുന്നതിനാല് പത്തനംതിട്ട, കോട്ടയം, എറണാകുളം ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ഇന്ന് അവധി പ്രഖ്യാപിച്ചിട്ടുണ്ട്.
Summary: A massive teak tree was uprooted by strong winds and fell onto a school bus in Meenchanda, Kozhikode. The incident occurred yesterday evening. Fortunately, no casualties have been reported, and further assessment of the damage is underway.
