മലപ്പുറത്ത് ഒരു വർഷത്തിലേറെയായി ഭാര്യയുമായി വേർപിരിഞ്ഞു താമസിക്കുന്ന യുവാവിന്റെ രണ്ടാം വിവാഹം കോടതി തടഞ്ഞു. എടപ്പാൾ നന്നംമുക്ക് ഒരുപ്പാക്കിൽ ഇഷാഖിന്റെ രണ്ടാം വിവാഹമാണ് കോടതി തടഞ്ഞത്. വ്യക്തിനിയമത്തിലെ നിബന്ധനകൾ പാലിക്കാതെ ഭർത്താവ് രണ്ടാം വിവാഹം കഴിക്കാനൊരുങ്ങുന്നു എന്ന മാറഞ്ചേരി നാലകത്ത് കാവുങ്ങലയിൽ ലുബ്ന അഷ്റഫിന്റെ ഹർജി പരിഗണിച്ച് പൊന്നാനി മുൻസിഫ് മജിസ്ട്രേറ്റ് കോടതി ഇടക്കാല ഉത്തരവ് പുറപ്പെടുവിച്ചു.
2017 ജൂലായ് അഞ്ചിനാണ് ലുബ്നയെ ഇഷാഖ് വിവാഹം കഴിച്ചത്. വിവാഹസമയത്ത് നൽകിയ 51 പവൻ ആഭരണങ്ങളും 25 പവൻ സ്വർണനാണയങ്ങളും ഭർത്തൃവീട്ടുകാർ വിവിധ ആവശ്യങ്ങൾക്ക് ചെലവാക്കുകയും പിന്നീട് ഇഷാഖും വീട്ടുകാരും നിരന്തരം ലുബ്ന ശാരീരികമായും മാനസികമായും പീഡിപ്പിക്കുകയും ചെയ്തു എന്നാണ് പരാതി.
പിന്നീട് ലുബ്നയെ സ്വന്തം വീട്ടിലാക്കി. ഇഷാഖ് മറ്റൊരു വിവാഹത്തിന് ശ്രമിക്കുന്നതറിഞ്ഞ് യുവതി അഡ്വ. പി.എൻ. സുജീർ മുഖേന കോടതിയെ സമീപിച്ചു. വ്യക്തിനിയമത്തിലെ നിബന്ധനകൾ പാലിക്കാതെ രണ്ടാംവിവാഹം കഴിക്കുന്നത് ലുബ്നയോടുള്ള ക്രൂരതയാണെന്ന വാദം അംഗീകരിച്ച്, മറ്റൊരുത്തരവുണ്ടാകുന്നതുവരെ വേറെ വിവാഹം കഴിക്കരുതെന്ന് ഉത്തരവിറക്കി.
English summary : The court stopped the second marriage of a young man from Malappuram
