ന്യൂഡൽഹി: ഐസിസി ടി20 റാങ്കിങ്ങിൽ ഇന്ത്യയുടെ സൂര്യകുമാർ യാദവിനെ പിന്തള്ളി ഓസ്ട്രേലിയയുടെ ഓപ്പണർ ട്രാവിസ് ഹെഡ് ഒന്നാമതെത്തി. ടി20 ലോകകപ്പിൽ സെമി കാണാതെ ഓസ്ട്രേലിയ പുറത്തായെങ്കിലും ഏഴു കളികളിൽ നിന്ന് 255 റൺസ് അടിച്ചുകൂട്ടിയതാണ് ഇടംകൈയൻ ബാറ്ററായ ട്രാവിസ് ഹെഡിന് ഗുണമായത്.Australia opener Travis Head overtakes India’s Suryakumar Yadav to top ICC T20 rankings
ലോകകപ്പിൽ ഇന്ത്യയ്ക്കെതിരായ ഓസ്ട്രേലിയയുടെ അവസാന മത്സരത്തിൽ 76 റൺസ് എടുത്ത ട്രാവിസ് ഹെഡ് ഒരു ഘട്ടത്തിൽ ടീമിനെ ജയിപ്പിക്കുമെന്ന് വരെ തോന്നിപ്പിച്ചിരുന്നു. അവസാന മൂന്ന് മത്സരത്തിൽ 31, 0,76 എന്നിങ്ങനെയാണ് ഹെഡിന്റെ ബാറ്റിങ് സംഭാവന. സൂര്യകുമാർ യാദവിന്റേത് 51,6,31 എന്നിങ്ങനെയാണ്. നാലുപേരെ പിന്തള്ളിയാണ് ഹെഡ് ഒന്നാമതെത്തിയത്.
844 പോയിന്റ് ആണ് ഹെഡിന് ഉള്ളത്. സൂര്യകുമാർ യാദവിനേക്കാൾ രണ്ടു പോയിന്റ് മുന്നിൽ. എന്നാൽ സൂര്യകുമാർ യാദവിന് ഒരാഴ്ചയ്ക്കകം തന്നെ സ്ഥാനം തിരിച്ചുപിടിക്കാനും അവസരമുണ്ട്. വരുന്ന ലോകകപ്പ് മത്സരങ്ങളിൽ മികച്ച പ്രകടനം പുറത്തെടുക്കാൻ കഴിഞ്ഞാൽ സൂര്യകുമാർ യാദവിന് ഒന്നാം സ്ഥാനം വീണ്ടെടുക്കാൻ സാധിക്കും.
ഫിൽ സാൾട്ട്, ബാബർ അസം, മുഹമ്മദ് റിസ്വാൻ, ജോഷ് ബട്ട്ലർ എന്നിവരാണ് ഹെഡിനും സൂര്യകുമാർ യാദവിനും തൊട്ടുപിന്നിൽ. ഇന്ത്യയുടെ തന്നെ യശ്വസി ജയ്സ്വാൾ ആണ് ഏഴാം സ്ഥാനത്ത്.
