സുനിൽ നരയ്ൻ എന്ന കരുത്തൻ കളം നിറഞ്ഞാടിയ മത്സരത്തിൽ ലക്നൗ സൂപ്പർ ജെയിംസിനെ 98 റൺസിനെ തകർത്ത് നൈറ്റ് റൈഡേഴ്സ് പോയിന്റ് നിലയിൽ ഒന്നാമത്. നരയ്ന്റെ നേതൃത്വത്തിൽ കൊൽക്കത്ത അടിച്ചുകൂട്ടിയ 236 റൺസ് പിന്തുടർന്ന ലക്നൗ താരങ്ങൾ 16. 1 ഓവറിൽ 137 റൺസിന് ഓൾഔട്ടായി. ആദ്യം ബാറ്റ് ചെയ്ത് കൊൽക്കത്ത നരെയ്ൻറെ സൂപ്പർബറ്റിംഗിൽ ആണ് മുന്നോട്ടു കുതിച്ചത്. ലക്നൗ ബൗളർമാരെ തലങ്ങും വിലങ്ങും പ്രഹരിച്ച നരെയ്ൻ 39 പന്തിൽ 7 സിക്സും ആറു ഫോർ മുൾപ്പെടെ 81 റൺസ് ആണ് വാരിക്കൂട്ടിയത്. ഫിലിപ് സോൾട്ട് (32), അങ്ക്രിഷ് രഘുവംശി (32), രമൺദീപ് സിങ് (25), ശ്രേയസ് അയ്യർ (23), റിങ്കു സിങ് (16 ) ആന്ദ്രെ റസ്സൽ (12) എന്നിവരും കൊൽക്കത്തയ്ക്കായി തിളങ്ങി.
മറുപടി ബാറ്റിങ്ങിൽ 21 പന്തിൽ 36 റൺസെടുത്ത മാർകസ് സ്റ്റോയിനിസാണു ലക്നൗവിനായി ഭേദപ്പെട്ട സ്കോർ നേടിയത്. ക്യാപ്റ്റൻ കെ.എൽ. രാഹുൽ (25), ആഷ്ടൻ ടേണർ (16), ആയുഷ് ബദോനി (15), നിക്കോളാസ് പുരാൻ (10) എന്നിവരും രണ്ടക്കം കടന്നു. എങ്കിലും അതൊന്നും കൊൽക്കത്തയെ മറികടക്കാൻ പോന്നതായിരുന്നില്ല. ഈ ജയത്തോടെ 16 പോയിന്റുമായി രാജസ്ഥാനെ മറികടന്ന് കൊൽക്കത്ത ഒന്നാമതെത്തി.
