കാസർകോട്: വീട്ടിൽ വോട്ട് ചെയ്ത് കാസർകോട് ജില്ലയിലെ ഏറ്റവും പ്രായം കൂടിയ വ്യക്തി കുപ്പച്ചിയമ്മ. 111 വയസുകാരി കുപ്പച്ചിയമ്മയുടെ വെള്ളിക്കോത്തെ വീട്ടിൽ വെച്ച് വീട്ടിലെ വോട്ടിൻ്റെ ജില്ല തല ഉദ്ഘാടനം നടന്നു. ജില്ലാ കലക്ടർ കെ. ഇമ്പശേഖറിന്റെ സാന്നിധ്യത്തിലാണ് വോട്ടെടുപ്പ് നടന്നത്.
പ്രായാധിക്യത്തിന്റെ ബുദ്ധിമുട്ടുകൾ ഉണ്ടെങ്കിലും കുപ്പച്ചിയമ്മ ഇതുവരെ വോട്ട് മുടക്കിയിട്ടില്ല. തിരഞ്ഞെടുപ്പ് കമ്മിഷന്റെ പുതിയ തീരുമാനപ്രകാരം ഇത്തവണ വീട്ടിൽ തന്നെ വോട്ട് ചെയ്യാനുള്ള അവസരം ലഭിച്ചതിന്റെ സന്തോഷത്തിലാണ് കുപ്പച്ചിയമ്മ. വെള്ളിക്കോത്ത് സ്കൂളിലെ 20ാം നമ്പർ ബൂത്തിലെ വോട്ടറാണ് ഇവർ. കന്നി വോട്ട് മുതൽ ഇതേ സ്കൂളിലെത്തിയാണ് വോട്ട് ചെയ്തത്. മകന്റെ ഭാര്യക്കും പേരക്കുട്ടികൾക്കും ഒപ്പമാണിപ്പോൾ താമസം.
