കൊടുമൺ പോറ്റിയുടെ മറ്റൊരു മുഖം കണ്ട് അമ്പരന്ന് ആരാധകർ
കൊച്ചി: അഖിൽ സത്യൻ സംവിധാനം ചെയ്ത് നിവിൻ പോളി മുഖ്യകഥാപാത്രമായെത്തുന്ന ചിത്രം ‘സർവ്വം മായ’ മലയാള സിനിമാ ചരിത്രത്തിൽ പുതിയ അധ്യായം കുറിച്ചിരിക്കുകയാണ്.
ഹൊറർ–കോമഡി വിഭാഗത്തിൽ പുറത്തിറങ്ങിയ ഈ ചിത്രം ആഗോള ബോക്സ് ഓഫീസിൽ 100 കോടി രൂപയുടെ നേട്ടം കൈവരിച്ചുവെന്ന പ്രഖ്യാപനം പ്രേക്ഷകരിലും സിനിമാ ലോകത്തും വലിയ ആവേശം സൃഷ്ടിച്ചു.
റിലീസ് ചെയ്ത് ചുരുങ്ങിയ ദിവസങ്ങൾക്കുള്ളിലാണ് ഈ ചരിത്രവിജയം സ്വന്തമാക്കിയത് എന്നതാണ് ചിത്രത്തിന്റെ പ്രത്യേകത.
ചിത്രത്തിന് ലഭിച്ച ശക്തമായ പ്രേക്ഷക പ്രതികരണങ്ങളും വാക്ക് ഓഫ് മൗത്ത് പ്രചാരണവും ഈ വിജയത്തിന് നിർണായക പങ്കുവഹിച്ചു. നിവിൻ പോളിയുടെ സ്വാഭാവിക നർമ്മവും ടൈമിങ്ങും പ്രേക്ഷകർ വീണ്ടും ഹൃദയത്തിലേറ്റെടുത്തു.
ഏറെക്കാലമായി ആരാധകർ കാത്തിരുന്ന “പഴയ നിവിൻ പോളി” തിരികെയെത്തിയെന്ന അഭിപ്രായമാണ് സോഷ്യൽ മീഡിയയിൽ നിറയുന്നത്.
ചിത്രത്തിലെ പ്രധാന ആകർഷണങ്ങളിലൊന്നാണ് റിയ ഷിബു അവതരിപ്പിച്ച ഡെലുലു എന്ന കഥാപാത്രം. ഡെലുലുവിന്റെ വ്യത്യസ്തമായ പെരുമാറ്റവും അവതരണവും സിനിമ കഴിഞ്ഞിട്ടും ചർച്ചയായി തുടരുകയാണ്.
കൊടുമൺ പോറ്റിയുടെ മറ്റൊരു മുഖം കണ്ട് അമ്പരന്ന് ആരാധകർ
ഈ കഥാപാത്രത്തെ ആസ്പദമാക്കി സൃഷ്ടിക്കപ്പെട്ട എ.ഐ ചിത്രങ്ങളാണ് ഇപ്പോൾ സോഷ്യൽ മീഡിയയിൽ വലിയ തരംഗമായി മാറിയിരിക്കുന്നത്.
‘ഡെലുലു യുഗം’ എന്ന പേരിൽ വൈറലായ ഈ എ.ഐ ദൃശ്യങ്ങൾ ഇൻസ്റ്റഗ്രാമിലൂടെ പങ്കുവെച്ചിരിക്കുന്നത് അഖിൽ കിളിയൻ എന്ന കണ്ടന്റ് ക്രിയേറ്ററാണ്.
‘സർവ്വം മായ’യിലെ ഡെലുലുവിനെയും മമ്മൂട്ടി അഭിനയിച്ച ‘ഭ്രമയുഗം’ എന്ന ചിത്രത്തിലെ കൊടുമൺ പോറ്റിയെയും ഒരേ ഫ്രെയിമിൽ അവതരിപ്പിക്കുന്ന രീതിയിലാണ് ഈ എ.ഐ ചിത്രങ്ങൾ ഒരുക്കിയിരിക്കുന്നത്.
സിനിമകളിലെ ലൊക്കേഷനുകളും കഥാപാത്രങ്ങളുടെയും ഭാവഭംഗികളും എ.ഐ സാങ്കേതികവിദ്യ ഉപയോഗിച്ച് പുനഃസൃഷ്ടിച്ചിരിക്കുന്നതാണ് ചിത്രങ്ങളുടെ പ്രത്യേകത.
സിനിമാ ലോകത്ത് എ.ഐ അധിഷ്ഠിത സൃഷ്ടികൾക്ക് വലിയ സ്വീകാര്യത ലഭിക്കുന്ന ഈ കാലഘട്ടത്തിൽ, ഇത്തരം പരീക്ഷണങ്ങൾ ആരാധകരുടെ ആവേശം ഇരട്ടിയാക്കിയിട്ടുണ്ട്.
മുൻപും വിവിധ സിനിമാ ലൊക്കേഷനുകൾ എ.ഐ വഴി പുനഃസൃഷ്ടിച്ച് ശ്രദ്ധ നേടിയിട്ടുള്ള അഖിൽ കിളിയന്റെ പുതിയ സൃഷ്ടികളും വലിയ രീതിയിൽ പങ്കുവെക്കപ്പെടുകയാണ്.
‘പാച്ചുവും അത്ഭുതവിളക്കും’ എന്ന ചിത്രത്തിലൂടെ സംവിധായകനെന്ന നിലയിൽ ശ്രദ്ധ നേടിയ അഖിൽ സത്യൻ, ‘സർവ്വം മായ’യിലൂടെ തന്റെ സിനിമാ ഭാഷയ്ക്ക് പുതിയ ഉയരം നൽകിയെന്നാണ് വിലയിരുത്തൽ.
ഹൊററും കോമഡിയും സമന്വയിപ്പിച്ച ഈ ചിത്രം, മലയാള സിനിമയ്ക്ക് അന്താരാഷ്ട്ര തലത്തിൽ പോലും പുതിയ പ്രതീക്ഷകൾ നൽകുന്ന ഒന്നായി മാറിയിരിക്കുകയാണ്.
