‘ബീറ്റ് ബുക്ക്’ പൂർണമായും ഡിജിറ്റലാക്കി മാറ്റും; കുറ്റവാളികളെ തേടി ഇനി എഐ എത്തും! ‘യക്ഷ്’ ആപ്പ്’ പുറത്തിറക്കി
ലഖ്നൗ: ഉത്തർപ്രദേശിലെ നിയമ–ക്രമസമാധാന സംവിധാനങ്ങൾ കൂടുതൽ ശക്തമാക്കുന്നതിനായി മുഖ്യമന്ത്രി യോഗി ആദിത്യനാഥ് എഐ അധിഷ്ഠിതമായ ‘യക്ഷ്’ (YAKSH) മൊബൈൽ ആപ്പ് പുറത്തിറക്കി.
ലഖ്നൗവിൽ നടന്ന മുതിർന്ന പൊലീസ് ഉദ്യോഗസ്ഥരുടെ സമ്മേളനത്തിലാണ് ആപ്പിന്റെ ഔദ്യോഗിക ഉദ്ഘാടനം നടന്നത്.
ആർട്ടിഫിഷ്യൽ ഇന്റലിജൻസ് സാങ്കേതികവിദ്യ ഉപയോഗിച്ച് പ്രവർത്തിക്കുന്ന ഈ ആപ്പ്, പോലീസിന്റെ കുറ്റാന്വേഷണ നടപടികൾ കൂടുതൽ വേഗത്തിലും കാര്യക്ഷമമായും നടത്താൻ സഹായിക്കും.
ഇതോടെ പോലീസിന്റെ കൈവശമുള്ള പഴയ കുറ്റവാളി വിവരങ്ങൾ അടങ്ങിയ ‘ബീറ്റ് ബുക്ക്’ പൂർണമായും ഡിജിറ്റലാക്കി മാറ്റും.
എഐ സാങ്കേതികവിദ്യയുടെ സഹായത്തോടെ സംശയാസ്പദരായ വ്യക്തികളുടെ മുഖം സ്കാൻ ചെയ്ത് പോലീസ് ഡാറ്റാബേസിലുള്ള കുറ്റവാളികളുമായി ഉടൻ ഒത്തുനോക്കാൻ കഴിയും.
ശബ്ദ കമാൻഡുകൾ വഴി തന്നെ കുറ്റവാളികളുടെ വിവരങ്ങൾ തിരയാനുള്ള സംവിധാനവും ആപ്പിൽ ഉൾപ്പെടുത്തിയിട്ടുണ്ട്.
ക്രിമിനൽ സംഘങ്ങൾ തമ്മിലുള്ള ബന്ധങ്ങൾ കണ്ടെത്താനും അവരുടെ നീക്കങ്ങൾ നിരീക്ഷിക്കാനും ഈ സംവിധാനം സഹായകമാകും.
കുറ്റവാളികൾ താമസം മാറുകയോ സംശയകരമായ ഇടങ്ങളിൽ സഞ്ചരിക്കുകയോ ചെയ്താൽ അതുസംബന്ധിച്ച വിവരങ്ങൾ തൽക്ഷണം പോലീസിന് ലഭിക്കും.
കുറ്റകൃത്യങ്ങളുമായി ബന്ധപ്പെട്ട ഡാറ്റ വിശകലനം ചെയ്യുന്നതിനും അന്വേഷണത്തിനാവശ്യമായ സഹായങ്ങൾ തേടുന്നതിനും പ്രത്യേക സംവിധാനങ്ങൾ ആപ്പിലുണ്ട്.
സൈബർ കുറ്റകൃത്യങ്ങൾ, മനുഷ്യക്കടത്ത്, സ്ത്രീസുരക്ഷ തുടങ്ങിയ വിഷയങ്ങൾക്ക് മുൻഗണന നൽകണമെന്ന് മുഖ്യമന്ത്രി നിർദ്ദേശിച്ചു. ഇതിന്റെ ഭാഗമായി ‘സ്മാർട്ട് എസ്എച്ച്ഒ ഡാഷ്ബോർഡ്’ എന്ന പുതിയ സംവിധാനവും നടപ്പിലാക്കും.
ഇതിലൂടെ പരാതികൾ പരിഹരിക്കുന്നതിലെ വേഗതയും സ്റ്റേഷൻ ഹൗസ് ഓഫീസർമാരുടെ പ്രവർത്തനക്ഷമതയും നേരിട്ട് വിലയിരുത്താനാകും.
ആധുനിക സാങ്കേതികവിദ്യകൾ പ്രയോജനപ്പെടുത്തി യുപി പോലീസിനെ കൂടുതൽ ജനസൗഹൃദമാക്കുകയാണ് സർക്കാരിന്റെ ലക്ഷ്യം.
English Summary
Uttar Pradesh Chief Minister Yogi Adityanath has launched an AI-powered mobile application named ‘YAKSH’ to strengthen law and order in the state. The app digitises police crime records, enables facial recognition, voice-based searches, criminal network analysis, and real-time monitoring. A Smart SHO Dashboard will also be introduced to improve policing efficiency, with special focus on cybercrime, human trafficking, and women’s safety.
AI-based ‘YAKSH’ App Launched to Strengthen Law and Order in Uttar Pradesh
Uttar Pradesh, Yogi Adityanath, YAKSH App, Artificial Intelligence, UP Police, Law and Order, Crime Investigation, Cyber Crime, Women Safety
