ബിജെപിയെ ചിലയിടങ്ങളിൽ സിപിഎം സഹായിച്ചെന്ന് സിപിഐ
ആലപ്പുഴ: തദ്ദേശ സ്വയംഭരണ തിരഞ്ഞെടുപ്പിൽ എൽഡിഎഫിന് നേരിട്ട പരാജയത്തിന് പ്രധാന കാരണങ്ങളായി ഭരണവിരുദ്ധ വികാരവും മുന്നണിക്കുള്ളിലെ ആഭ്യന്തര പ്രശ്നങ്ങളും ചൂണ്ടിക്കാട്ടി സിപിഐ.
ഘടകകക്ഷികൾ തമ്മിലുള്ള ഏകോപനക്കുറവ് പരാജയത്തിന്റെ തോത് വർധിപ്പിച്ചതായും സിപിഐ ആലപ്പുഴ ജില്ലാ കൗൺസിൽ വിലയിരുത്തി.
ജില്ലയിൽ ചില മേഖലകളിൽ സിപിഎം ബിജെപിയെ സഹായിക്കുന്ന തരത്തിലുള്ള നിലപാടാണ് സ്വീകരിച്ചതെന്ന ഗുരുതര ആരോപണവും സിപിഐ ഉയർത്തി.
ചെങ്ങന്നൂർ, മാവേലിക്കര മണ്ഡലങ്ങളിലെ ചില വാർഡുകളിൽ സിപിഎമ്മിന്റെ സമീപനം ബിജെപിക്ക് അനുകൂലമായിരുന്നുവെന്നാണ് സിപിഐയുടെ ആരോപണം.
സിപിഐ സ്ഥാനാർഥികൾ മത്സരിച്ച പല പ്രദേശങ്ങളിലും സിപിഎം വിമതരുടെ സാന്നിധ്യം പ്രകടമായിരുന്നുവെന്നും, സിപിഐയുടെ വിജയത്തിൽ സിപിഎമ്മിന് ആവശ്യമായ താത്പര്യം കാണിച്ചില്ലെന്നും ജില്ലാ കൗൺസിൽ കുറ്റപ്പെടുത്തി.
കുട്ടനാട് മേഖലയിലെ സിപിഎം–സിപിഐ ഭിന്നതയും തിരഞ്ഞെടുപ്പ് പരാജയത്തിന് കാരണമായതായി വിലയിരുത്തലുണ്ട്.
അതേസമയം, എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ നടത്തിയ ചില വിവാദ പ്രസ്താവനകളെ ശക്തമായി എതിർക്കാൻ എൽഡിഎഫിന് സാധിക്കാതിരുന്നതും ന്യൂനപക്ഷ വിഭാഗങ്ങളിൽ മുന്നണിയോടുള്ള വിശ്വാസം കുറയാൻ ഇടയാക്കിയതായി സിപിഐ വിലയിരുത്തി.
സർക്കാർ കൂടുതൽ തിരുത്തലുകൾ നടത്തേണ്ടതുണ്ടെന്നും ജില്ലാ കൗൺസിൽ അഭിപ്രായപ്പെട്ടു.
പ്രാഥമിക വിലയിരുത്തലിന്റെ അടിസ്ഥാനത്തിൽ മണ്ഡലം കമ്മിറ്റികൾ വിശദമായ റിപ്പോർട്ട് തയ്യാറാക്കി ഈ മാസം 31ന് മുമ്പ് ജില്ലാ നേതൃത്വത്തിന് സമർപ്പിക്കണമെന്നും നിർദ്ദേശിച്ചിട്ടുണ്ട്.
ഇതിനിടെ, തദ്ദേശ തിരഞ്ഞെടുപ്പിൽ നിരവധി ജില്ലകളിൽ എൽഡിഎഫിൽ മുന്നണി മര്യാദ പാലിക്കപ്പെട്ടില്ലെന്ന ആരോപണവുമായി ഇന്ത്യൻ നാഷണൽ ലീഗ് (ഐഎൻഎൽ) രംഗത്തെത്തി.
പാർട്ടിയുടെ സംസ്ഥാന സമിതി യോഗത്തിലാണ് മുന്നണി നേതൃത്വത്തിനെതിരെ ശക്തമായ വിമർശനം ഉയർന്നത്.
ശബരിമല സ്വർണക്കള്ളക്കേസുമായി ബന്ധപ്പെട്ട വിഷയങ്ങൾ തിരഞ്ഞെടുപ്പിൽ എൽഡിഎഫിന് വലിയ തിരിച്ചടിയായെന്നും, കേസിൽ ഉൾപ്പെട്ടവർക്കെതിരെ നടപടികൾ വൈകിയതും ദോഷകരമായെന്നും ഐഎൻഎൽ സംസ്ഥാന പ്രസിഡന്റ് അഹമ്മദ് ദേവർകോവിൽ എംഎൽഎയും ജനറൽ സെക്രട്ടറി കാസിം ഇരിക്കൂറും പറഞ്ഞു.
ചില ജില്ലകളിൽ ഐഎൻഎൽ സ്ഥാനാർഥികൾക്ക് പാർട്ടി വോട്ടുകൾ മാത്രമാണ് ലഭിച്ചതെന്നും, തിരഞ്ഞെടുപ്പ് ഘട്ടങ്ങളിൽ എൽഡിഎഫിൽ യഥാർത്ഥ ‘മുന്നണി സ്പിരിറ്റ്’ പ്രകടമായില്ലെന്നും യോഗത്തിൽ വിമർശനമുയർന്നു.
ഘടകകക്ഷികളെ അവഗണിച്ച സമീപനം അണികളിൽ നിരാശ സൃഷ്ടിച്ചതായും ഐഎൻഎൽ നേതൃത്വം വിലയിരുത്തി. ഭരണവിരുദ്ധ വികാരം അത്ര ശക്തമായിരുന്നില്ലെങ്കിലും, മുന്നണിയുടെ അമിത ആത്മവിശ്വാസമാണ് തിരിച്ചടിക്ക് വഴിവെച്ചതെന്നും കാസിം ഇരിക്കൂർ വ്യക്തമാക്കി.
English Summary:
The CPI has attributed the LDF’s defeat in the local body elections to anti-incumbency sentiment and serious internal issues within the front. The party accused the CPM of lack of coordination and even indirectly helping the BJP in certain wards of Alappuzha district. CPI pointed to factionalism, CPM rebels, and inter-party rivalry—especially in regions like Chengannur, Mavelikkara, and Kuttanad—as key reasons for the setback.
Meanwhile, the Indian National League (INL) also criticized the LDF leadership for failing to maintain coalition discipline. INL leaders said issues like the Sabarimala gold smuggling case and delayed action against the accused hurt the front electorally. Both CPI and INL called for corrective measures and better coordination within the LDF.
ldf-defeat-local-body-polls-cpi-inl-criticism
LDF, CPI, CPM, INL, Local Body Elections, Alappuzha, Kerala Politics, Coalition Issues, Anti-Incumbency, BJP
