പിണറായി സർക്കാരിന്റെ സ്വപ്നപദ്ധതിക്ക് പൂട്ടുവീണു; ശബരിമല വിമാനത്താവള പദ്ധതിയിൽ അടിമുടി മാറ്റം
സ്വപ്നപദ്ധതിയെന്ന പേരിൽ വൻപ്രചാരണം നടത്തിയ ശബരിമല വിമാനത്താവള ഭൂമി ഏറ്റെടുക്കൽ വിജ്ഞാപനം ഹൈക്കോടതി റദ്ദാക്കിയത് സിപിഎമ്മിനും ഇടതുമുന്നണിക്കും വലിയ രാഷ്ട്രീയ തിരിച്ചടിയായി.
തിരുവല്ല ആസ്ഥാനമായ ബിലീവേഴ്സ് ചർച്ച് ഉടമസ്ഥതയിലുള്ള ചെറുവള്ളി എസ്റ്റേറ്റും സമീപ പ്രദേശങ്ങളും ഉൾപ്പെടുത്തി 2,570 ഏക്കർ ഭൂമി ഏറ്റെടുക്കാനുള്ള സർക്കാർ നീക്കത്തിനാണ് കോടതി സ്റ്റേ നൽകിയത്.
വലിയ അന്താരാഷ്ട്ര വിമാനത്താവളത്തിന് പോലും ഏകദേശം 1,200 ഏക്കർ ഭൂമി മതിയാകുമ്പോൾ, എന്തിനാണ് ഇത്രയേറെ ഭൂമി ആവശ്യപ്പെടുന്നതെന്ന കോടതിയുടെ ചോദ്യത്തിന് സർക്കാർ വ്യക്തമായ മറുപടി നൽകാൻ പരാജയപ്പെട്ടത് ഇടപാടിലെ ദുരൂഹതകൾ കൂടുതൽ ശക്തമാക്കുന്നു.
2,263 ഏക്കർ വരുന്ന ചെറുവള്ളി എസ്റ്റേറ്റും സ്വകാര്യ വ്യക്തികളുടെ 307 ഏക്കർ ഭൂമിയും ഉൾപ്പെടുത്തിയാണ് വിജ്ഞാപനം പുറപ്പെടുവിച്ചിരുന്നത്.
ചെറുവള്ളി എസ്റ്റേറ്റിന്റെ ഉടമസ്ഥാവകാശം തന്നെ നിരവധി കേസുകളിലും അവകാശവാദങ്ങളിലും കുടുങ്ങിയിരിക്കുമ്പോഴാണ് സർക്കാർ ഭൂമി ഏറ്റെടുക്കാൻ മുന്നിട്ടിറങ്ങിയത്.
തുടക്കം മുതൽ തന്നെ ഈ ഇടപാടിന് പിന്നിൽ സിപിഎം നേതാക്കളുടെ കമ്മീഷൻ താൽപര്യമുണ്ടെന്ന ആരോപണം ശക്തമായിരുന്നു. 2017 ജൂലൈയിലാണ് ശബരിമല വിമാനത്താവളത്തിന് ചെറുവള്ളി എസ്റ്റേറ്റ് അനുയോജ്യമെന്ന വിലയിരുത്തൽ ഉയർന്നത്.
സംസ്ഥാനത്തെ അഞ്ചാമത്തെ അന്താരാഷ്ട്ര വിമാനത്താവളമെന്ന അവകാശവാദത്തോടെയായിരുന്നു പദ്ധതി മുന്നോട്ട് കൊണ്ടുപോയത്.
ഭൂമി ഏറ്റെടുക്കൽ നടപടികൾ ആരംഭിച്ചപ്പോഴേ ശക്തമായ പ്രതിഷേധങ്ങളും വിവാദങ്ങളും ഉയർന്നു.
വിമാനത്താവള പദ്ധതിയുടെ സാധ്യതാപഠനത്തിന് നിയോഗിക്കപ്പെട്ട അമേരിക്കൻ കൺസൾട്ടൻസി കമ്പനിയായ ലൂയിസ് ബർഗറിന്റെ യോഗ്യതയെ ചൊല്ലിയും ഗുരുതര ആരോപണങ്ങൾ ഉയർന്നിരുന്നു.
പ്രാഥമിക റിപ്പോർട്ട് നൽകിയ അതേ കമ്പനിക്കുതന്നെ വിശദമായ സാധ്യതാപഠനവും ഏൽപ്പിച്ചതും നിയമവിരുദ്ധവും കമ്മീഷൻ ലക്ഷ്യമിട്ടതുമാണെന്നായിരുന്നു പ്രധാന വിമർശനം.
ഈ കൺസൾട്ടൻസിക്ക് 4.63 കോടി രൂപ ഫീസ് നൽകിയതായും ആരോപണമുണ്ടായിരുന്നു.
മുഖ്യമന്ത്രി ഈ ആരോപണങ്ങളെല്ലാം തുടക്കത്തിൽ തന്നെ തള്ളിയിരുന്നു. പ്രതിപക്ഷ നേതാവായിരുന്ന രമേശ് ചെന്നിത്തലയാണ് ലൂയിസ് ബർഗറിനെതിരായ ആരോപണങ്ങൾ ശക്തമായി ഉന്നയിച്ചത്.
ചെറുവള്ളി എസ്റ്റേറ്റ് ഏറ്റെടുക്കുന്നതിനെതിരെ റവന്യൂ ഉദ്യോഗസ്ഥരായ നിവേദിത പി. ഹരൻ, രാജമാണിക്യം തുടങ്ങിയവർ നൽകിയ മുന്നറിയിപ്പുകളും സർക്കാർ അവഗണിച്ചു.
ഹാരിസൺ മലയാളം പ്ലാന്റേഷൻസിന്റെ ഉടമസ്ഥതയിലായിരുന്ന ഈ എസ്റ്റേറ്റ് പിന്നീട് ബിലീവേഴ്സ് ചർച്ച് വാങ്ങിയതും ദുരൂഹ ഇടപാടുകളിലൂടെയാണെന്ന ആരോപണങ്ങൾ നിലനിൽക്കെയാണ് സർക്കാർ പൊന്നുംവില നൽകി ഭൂമി ഏറ്റെടുക്കാൻ ശ്രമിച്ചത്.
ഈ മുഴുവൻ പശ്ചാത്തലത്തിലും ഹൈക്കോടതി വിധി സർക്കാരിനും മുന്നണിക്കും കടുത്ത തിരിച്ചടിയായി മാറുകയാണ്.
English Summary
The Kerala High Court’s decision to quash the land acquisition notification for the proposed Sabarimala airport has dealt a major blow to the Pinarayi Vijayan government and the CPM-led LDF. The notification sought to acquire 2,570 acres, including the Cheruvally Estate owned by the Believers Church. The court questioned the need for such a vast extent of land when even large international airports require far less space. The government’s failure to give a clear explanation has intensified allegations of irregularities and commission deals. The verdict also revives controversies surrounding land ownership, ignored revenue officials’ warnings, and the role of the US-based consultancy Louis Berger in the project.
sabarimala-airport-land-acquisition-hc-quash-cpm-setback
Sabarimala airport, Kerala High Court, Pinarayi government, CPM, Cheruvally Estate, Believers Church, land acquisition, Kerala politics
