ഇസ്രായേലിലെ വിമാനത്താവളത്തിൽ ഹൂതി വിമതരുടെ ഡ്രോൺ ആക്രമണം; മുന്നറിയിപ്പ് സൈറൺ മുഴങ്ങിയില്ല; ആശങ്ക
തെക്കൻ ഇസ്രായേലിലെ റാമോൺ വിമാനത്താവളത്തിൽ യെമനിൽ നിന്നുള്ള ഹൂതി വിമതരുടെ ഡ്രോൺ ആക്രമണം നടന്നു. സ്‌ഫോടക വസ്തുക്കൾ നിറച്ച ഡ്രോൺ പതിച്ചതിനെ തുടർന്ന് വിമാനത്താവളത്തിനു ചുറ്റുമുള്ള വ്യോമാതിർത്തി അടച്ചിടേണ്ടി വന്നു.
പരിക്കേറ്റവർ
സംഭവത്തിൽ രണ്ട് പേർക്ക് പരിക്കേറ്റതായി പ്രാഥമിക വിവരം. പരിക്കേറ്റവരുടെ നില ഗുരുതരമല്ലെന്ന് റിപ്പോർട്ടുകൾ വ്യക്തമാക്കുന്നു.
ഇസ്രായേൽ പ്രതിരോധ സേന (IDF) അറിയിച്ചു: യെമനിൽ നിന്നുള്ള മൂന്ന് ഡ്രോണുകൾ ഇതിനുമുമ്പ് വെടിവെച്ചിട്ടുണ്ടെങ്കിലും, ഒന്ന് വിമാനത്താവളത്തിൽ പതിച്ചുവെന്നാണ് വിവരം.
സൈറൺ മുഴങ്ങാത്തത് ആശങ്ക ഉയർത്തി
വ്യോമാക്രമണ മുന്നറിയിപ്പ് നൽകുന്ന സൈറണുകൾ പ്രവർത്തിച്ചില്ലെന്നത് ഇസ്രായേൽ പ്രതിരോധ സംവിധാനത്തെ ആശങ്കയിലാഴ്ത്തി. സൈന്യം തന്നെ സൈറൺ മുഴങ്ങിയില്ലെന്ന് സ്ഥിരീകരിക്കുകയും വിഷയത്തിൽ അന്വേഷണം ആരംഭിക്കുകയും ചെയ്തു.
അന്വേഷണത്തിൽ പ്രതിരോധ സേന
യെമനിൽ നിന്നുള്ള ഹൂതി ഡ്രോൺ തിരിച്ചറിയുന്നതിൽ ഉണ്ടായ പരാജയം സംബന്ധിച്ച് അന്വേഷണം പുരോഗമിക്കുന്നതായി ഐഡിഎഫ് വ്യക്തമാക്കി.
അതേസമയം, മറ്റ് മൂന്ന് ഹൂതി ഡ്രോണുകളെ ഇസ്രായേലി വ്യോമസേന വെടിവെച്ചിട്ടുണ്ടെന്നും അധികൃതർ അറിയിച്ചു.
റഷ്യയെ വിറപ്പിച്ച് വൻ ഡ്രോൺ ആക്രമണം നടത്തി യുക്രെയ്ൻ; ആക്രമിക്കപ്പെട്ടത് 40 വിമാനങ്ങൾ
മോസ്കോ: റഷ്യൻ വ്യോമതാവളങ്ങൾ ലക്ഷ്യമിട്ട് വൻ ഡ്രോണാക്രമണം നടത്തി യുക്രെയ്ൻ. റഷ്യയ്ക്കു നേരെ യുക്രെയ്ൻ പ്രയോഗിച്ചതിൽ വച്ചേറ്റവും വലിയ ഡ്രോൺ ആക്രമണങ്ങളിൽ ഒന്നാണിത്
40 റഷ്യൻ വിമാനങ്ങൾ ആക്രമിച്ചതായി യുക്രെയ്ൻ സൈനികവൃത്തങ്ങളെ ഉദ്ധരിച്ച് ദ് കീവ് ഇൻഡിപെൻഡന്റ് റിപ്പോർട്ട് ചെയ്യുന്നു.
യുക്രെയ്നിൽ നിന്ന് 4,000 കിലോമീറ്റർ അകലെ, കിഴക്കൻ സൈബീരിയയിലെ ഇർകുട്സ്ക് മേഖലയിലുള്ള ബെലായ, ഒലെന്യ വ്യോമതാവളങ്ങളടക്കം യുക്രെയ്ൻ ആക്രമിച്ചെന്നാണ് പുറത്തു വരുന്ന വിവരം.
ആക്രമണം ഇർകുട്സ്ക് ഗവർണർ ഔദ്യോഗികമായി സ്ഥിരീകരിച്ചിട്ടുണ്ട്. ആദ്യമായാണ് യുക്രെയ്ൻ സൈബീരിയയിൽ ആക്രമണം നടത്തുന്നത്.
യുക്രെയ്ന്റെ റിമോട്ട് പൈലറ്റഡ് വിമാനം സ്രിഡ്നി ഗ്രാമത്തിലെ ഒരു സൈനിക യൂണിറ്റിനെ ആക്രമിച്ചുവെന്ന് ഗവർണർ വെളിപ്പെടുത്തി.
ആക്രമണത്തിന്റെ വിഡിയോ ദൃശ്യങ്ങൾ പുറത്തുവന്നിട്ടുണ്ട്. യുക്രെയിൻ ആക്രമണം നേരിടാൻ റഷ്യൻ സൈന്യം സജ്ജമായതായാണ് റിപ്പോർട്ടുകൾ. ഡ്രോൺ വിക്ഷേപണത്തിന്റെ ഉറവിടം തടഞ്ഞതായും വിവരമുണ്ട്.
ശത്രുഡ്രോണുകൾ മർമാൻസ്ക് മേഖലയിൽ ആക്രമണം നടത്തിയതായി മർമാൻസ്ക് ഗവർണർ ആൻഡ്രി ചിബിസും സ്ഥിരീകരിച്ചിട്ടുണ്ട്. ആക്രമണത്തിനായി ഏതു തരം ഡ്രോണുകളാണ് ഉപയോഗിച്ചതെന്ന വിവരം ഇതുവരെ യുക്രെയ്ൻ പുറത്തുവിട്ടിട്ടില്ല.
വ്യോമതാവളങ്ങൾക്ക് സമീപം പാർക്ക് ചെയ്തിരുന്ന വാനുകളിൽ നിന്നാണ് ഡ്രോണുകൾ വിക്ഷേപിച്ചതെന്നും സ്ഥിരീകരിക്കാത്ത റിപ്പോർട്ടുകളുണ്ട്.
