ലക്നൗ: ഇന്ത്യൻ ക്രിക്കറ്റ് താരം റിങ്കു സിംഗിന്റെ വിവാഹ നിശ്ചയം ജൂണ് 8ന്.ഉത്തര്പ്രദേശിലെ മച്ലിഷഹര് ലോക്സഭാ മണ്ഡലത്തില് നിന്നുള്ള പാര്ലമെന്റ് അംഗം പ്രിയ സരോജ് ആണ് വധു.
സമാജ്വാദി പാര്ട്ടിയുടെ ഉത്തര്പ്രദേശിലെ മുതിര്ന്ന നേതാവും മൂന്ന് തവണ എംപിയും നിലവിലെ കേരാകട് എംഎല്എയുമായ തുഫാനി സരോജിന്റെ മകളാണ് പ്രിയ. ലക്നൗവിലെ സ്വകാര്യ ഹോട്ടലില് വച്ചാണ് നിശ്ചയം നടക്കുന്നത്.
നിലവിലെ ലോക്സഭയിലെ ഏറ്റവും പ്രായം കുറഞ്ഞ രണ്ടാമത്തെ അംഗം കൂടിയാണ് 25 വയസുള്ള പ്രിയ സരോജ്. അഭിഭാഷക കൂടിയായ പ്രിയ സരോജ് ജഡ്ജിയാവണമെന്ന തൻ്റെ മോഹം മാറ്റിവെച്ചാണ് പിതാവിന്റെ പാത പിന്തുടര്ന്ന് രാഷ്ട്രീയത്തില് ഇറങ്ങിയത്.
കഴിഞ്ഞ ലോക്സഭാ തെരഞ്ഞെടുപ്പില് ബിജെപി എംപിയായിരുന്ന ഭോലാനാഥിനെ 35,850 വോട്ടുകളുടെ ഭൂരിപക്ഷത്തിൽ പരാജയപ്പെടുത്തിയാണ് പ്രിയ സരോജ് ലോക്സഭയിലെ ഏറ്റവും പ്രായം കുറഞ്ഞ രണ്ടാമത്തെ അംഗമായത്.
ഇന്ത്യൻ ടി20 ടീമില് ഫിനിഷര് റോളില് തിളങ്ങുന്ന റിങ്കു സിംഗ് 2023ലെ ഐപിഎല്ലില് ഒരോവറില് അഞ്ച് സിക്സ് അടക്കം 31 റണ്സടിച്ചതോടെയാണ് ശ്രദ്ധേയനായത്.
55 ലക്ഷം രൂപക്ക് കൊല്ക്കത്ത ടീം നിലനിര്ത്തിയ താരത്തെ ഇത്തവണത്തെ മെഗാ താരലേലത്തിന് മുമ്പ് 13 കോടി രൂപക്കാണ് ടീം നിലനിര്ത്തിയത്
