യുകെ മലയാളി യുവതി ടീന സെല്‍ജോ (38) അന്തരിച്ചു. ഇന്നലെ വൈകുന്നേരമാണ് ഡഗ്ലസ് മക്മില്ലന്‍ ഹോസ്‌പൈസില്‍ വച്ച് ടീന മരണത്തിനു കീഴടങ്ങിയത്. ഒരു വര്‍ഷത്തിലേറെയായി കാന്‍സറിന് ചികിത്സയിലായിരുന്നു.
നാട്ടിലേക്ക് യാത്ര ചെയ്യാനുള്ള ആരോഗ്യം ഇല്ലാതിരുന്നതിനാല്‍ കുട്ടികളെ എമര്‍ജന്‍സി വിസയില്‍ യുകെയില്‍ എത്തിക്കാനുള്ള ശ്രമങ്ങള്‍ നടത്തുന്നതിനിടയിലാണ് ടീനമോളുടെ മരണം സംഭവിച്ചത്.
കെയറര്‍ വിസയിലാണ് രണ്ടു വര്‍ഷം മുന്‍പ് ടീന കുടുംബത്തോടൊപ്പം യുകെയില്‍ എത്തിയത്. ഇവിടെ വന്ന് അധികനാള്‍ ആകുന്നതിനുമുമ്പേ കാന്‍സര്‍ തിരിച്ചറിഞ്ഞപ്പോള്‍ ടീന നാട്ടില്‍ പോയി ചികിത്സ കഴിഞ്ഞ് മടങ്ങി വരികയും തിരിച്ചു ജോലിയില്‍ പ്രവേശിക്കുകയും ചെയ്തിരുന്നു.
എന്നാൽ, കാന്‍സര്‍ തലച്ചോറിലേക്ക് വ്യാപിച്ചത്തോടെ റോയല്‍ സ്റ്റോക്ക് ഹോസ്പിറ്റലില്‍ ബ്രെയിന്‍ സര്‍ജറിയും, റേഡിയേഷന്‍ ഉള്‍പ്പെടെയുള്ള ചികിത്സകളും നടത്തി. എന്നാൽ നില ഗുരുതരമാവുകയായിരുന്നു.
നാട്ടില്‍ പോയി തന്റെ പിഞ്ചു മക്കളെയും മാതാപിതാക്കളെയും കാണണം എന്ന ആഗ്രഹം ബാക്കിവച്ചാണ് ടീന യാത്രയായത്. ഭര്‍ത്താവ് സെല്‍ജോ ജോണ്‍. മക്കള്‍ ആഞ്ജലീന, ആന്‍ഡ്രിയ. നാട്ടില്‍ കൂത്താട്ടുകുളം സ്വദേശിനിയാണ്.
