കോഴിക്കോട്: വടകര ജില്ല ആശുപത്രിയിലെ സ്റ്റീൽ വേലിക്കുള്ളിൽ തല കുടുങ്ങിയ ആറു വയസുകാരിയെ അഗ്നിരക്ഷ സേന രക്ഷപ്പെടുത്തി. ഇന്ന് ഉച്ചക്ക് 12 മണിയോടെയാണ് സംഭവം. കുട്ടിയുടെ തല സ്റ്റീൽ ബാരിയറിനുള്ളിൽ കുടുങ്ങുകയായിരുന്നു. വടകര ജില്ലാ ആശുപത്രിയിലെ സ്ത്രീകളുടെയും കുട്ടികളുടെയും വിഭാഗത്തിലെ സ്റ്റീൽ വേലിക്കിടയിലാണ് കുടുങ്ങിയത്.
ആശുപത്രി അധികൃതരും കുട്ടിയുടെ ബന്ധുക്കളും കുട്ടിയെ രക്ഷിക്കാൻ ശ്രമിച്ചെങ്കിലും നടന്നില്ല. തുടർന്ന് അഗ്നിരക്ഷ സേനയും പൊലീസും ചേർന്നാണ് കുട്ടിയെ രക്ഷിച്ചത്. സ്റ്റീൽ വേലി മുറിച്ചു മാറ്റിയായിരുന്നു രക്ഷാപ്രവർത്തനം. അരമണിക്കൂറിലേറെ നേരം കുട്ടി കുടുങ്ങിക്കിടന്നെങ്കിലും ആരോഗ്യപ്രശ്നങ്ങളൊന്നും തന്നെ ഇല്ലെന്ന് ആശുപത്രി അധികൃതർ അറിയിച്ചു.
