വിവാഹ വാർഷികാഘോഷ ചടങ്ങിനിടെ 50 കാരൻ കുഴഞ്ഞുവീണ് മരിച്ചു. ഷൂ ബിസിനസുകാരനായ വസീം സർവത് ആണ് മരിച്ചത്.
ഉത്തർപ്രദേശിലെ ബറേലിയിലെ ദമ്പതികളുടെ വിവാഹ വാർഷിക ആഘോഷമാണ് മരണവേദിയായത്.
പിലിഭിത്ത് ബൈപാസ് റോഡിലെ ഒരു വേദിയിൽ നടന്ന പാർട്ടിക്കിടെ കഴിഞ്ഞദിവസമായിരുന്നു സംഭവം. 25 മത് വാർഷികം ഭാര്യ ഫറയ്ക്കും കുടുംബാംഗങ്ങൾക്കും സുഹൃത്തുക്കൾക്കുമൊപ്പം ആഘോഷിക്കുന്നതിനിടെ ഹൃദയാഘാതമുണ്ടാവുകയും കുഴഞ്ഞുവീഴുകയുമായിരുന്നു. സ്കൂൾ അധ്യാപികയാണ് വസീമിന്റെ ഭാര്യ ഫറ.
വേദിയിൽ പാട്ടുകൾക്കൊപ്പം നൃത്തം ചെയ്യുകയായിരുന്നു ദമ്പതികൾ. ഇതിനിടെ വസീം പെട്ടെന്ന് കുഴഞ്ഞുവീണു. ബന്ധുക്കൾ ഓടിയെത്തി വസീമിനെ അടുത്തുള്ള സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ഡോക്ടർമാർ മരണം സ്ഥിരീകരിച്ചു. ദമ്പതികളുടെ ക്ഷണം സ്വീകരിച്ച് നിരവധി പേർ ചടങ്ങിനെത്തിയിരുന്നു.
ഇരുവരും ഒരുമിച്ച് വേദിയിൽ കേക്ക് മുറിക്കാനും പദ്ധതിയിട്ടിരുന്നു. പക്ഷേ അതിനു മുമ്പ് ഭർത്താവിനെ മരണം തേടിയെത്തുകയായിരുന്നു. രണ്ട് ആൺമക്കളുണ്ട്.
ലണ്ടൻ തേംസ് നദിയിൽ 11 വയസുകാരി പെൺകുട്ടിയെ കാണാതായി..! തിരച്ചിൽ തുടർന്ന് പോലീസ്
ലണ്ടൻ തേംസ് നദിയിൽ കാണാതായ പെൺകുട്ടിയുടെ കൂടുതൽ വിവരങ്ങൾ പുറത്തുവിട്ടു പോലീസ്. 11 വയസുകാരിയായ കാലിയ കോവ എന്ന കുട്ടിയെയാണ് കാണാതായത്. കുട്ടിയുടെ ഫോട്ടോ ഉൾപ്പെടെയുള്ള വിവരങ്ങൾ ആണ് മെട്രോപൊളിറ്റൻ പോലീസ് പുറത്തുവിട്ടത്.
തിങ്കളാഴ്ചയാണ് ഈസ്റ്റ് ലണ്ടനിലെ ലണ്ടൻ സിറ്റി എയർപോർട്ടിന് സമീപമുള്ള ബാർജ്ഹൗസ് കോസ്വേയ്ക്ക് സമീപം കളിച്ചുകൊണ്ടിരിക്കെ പെൺകുട്ടി നദിയിൽ വീണത്.
നദിയുടെ സമീപത്ത് നിന്ന് ഷൂസ്, സോക്സ്, കോട്ട്, ഫോൺ എന്നിവ കണ്ടെത്തിയതായും അവ പോലീസിന് കൈമാറിയതായും പ്രദേശവാസിയായ സ്ത്രീ പറഞ്ഞു. തിങ്കളാഴ്ച ഏകദേശം ഒരു മണിക്ക് സംഭവം നടന്ന ഉടനെ പോലീസിന് വിവരം ലഭിച്ചിരുന്നു.
അത്യാഹിതം സംഭവിച്ച ഉടനെ തന്നെ അടിയന്തിര സേവനങ്ങൾ പെൺകുട്ടിക്കായി തിരച്ചിൽ ആരംഭിച്ചു. ലണ്ടൻ ആംബുലൻസ് സർവീസ്, ലണ്ടൻ ഫയർ ബ്രിഗേഡ് (എൽഎഫ്ബി), ആർഎൻഎൽഐ എന്നിവയിൽ നിന്നുള്ള ജീവനക്കാർ രക്ഷാപ്രവർത്തനത്തിൽ പങ്കുചേർന്നെങ്കിലും ഫലമുണ്ടായില്ല.
പെൺകുട്ടിയെ കാണാതായി ദിവസങ്ങൾ കഴിഞ്ഞിട്ടും കണ്ടെത്താനാകാത്തത് മാധ്യമങ്ങളിൽ വൻ വാർത്താ പ്രാധാന്യത്തോടെയാണ് റിപ്പോർട്ട് ചെയ്തത്. പെൺകുട്ടിക്ക് വേണ്ടിയുള്ള തിരച്ചിലിൻ്റെ ഭാഗമായി ഡ്രോൺ സാങ്കേതികവിദ്യയും ബോട്ടുകളും ഉപയോഗിക്കുന്നുണ്ടെന്ന് പോലീസ് അറിയിച്ചു.
പെൺകുട്ടിയെ കണ്ടെത്തുന്നതിന് സേന പ്രതിജ്ഞാബദ്ധരാണെന്ന് നോർത്ത് ഈസ്റ്റ് ലണ്ടനിലെ ലോക്കൽ പോലീസിലെ കമാൻഡർ ആയ ഡാൻ കാർഡ് പറഞ്ഞു.
ബാർജ് ഹൗസ് കോസ്വേ എന്നത് തേംസ് നദിയിലേക്ക് നേരിട്ട് പോകുന്ന ഒരു കോൺക്രീറ്റ് ചരിവാണ്. ഇത് ബോട്ടുകൾ കൊണ്ടുപോകാൻ ഉപയോഗിക്കുന്നു. ഇത് പായൽ മൂടിയതായും വഴുക്കലുള്ളതായും താമസക്കാർ ചൂണ്ടിക്കാട്ടി.
