ലഹരി മൂലം ഉണ്ടാകുന്ന ദുരന്തങ്ങളെ കുറിച്ചുള്ള വാർത്തകൾ ദിനംപ്രതി പെരുകി വരികയാണ്. ലഹരിക്കടിയായി ആളുകൾ ആളുകളെ കൊല്ലുന്ന അവസ്ഥയിലേക്ക് വരെ കാര്യങ്ങൾ എത്തിയിരിക്കുന്നു. അതിന്റെ ഏറ്റവും ഒടുവിലത്തെ ഉദാഹരണമായി ഒരു വാർത്ത എത്തിയിരിക്കുകയാണ്. (young man who came to meet his pregnant wife in Kattappana was hacked to death by a neighbor)
ഗർഭിണിയായ ഭാര്യയെ കാണാനായി ഭാര്യവീട്ടിലെത്തിലെത്തിയ യുവാവിനെ അയൽവാസിയായ മധ്യവയസ്കൻ വെട്ടിക്കൊലപ്പെടുത്തി. കക്കാട്ടുകട കളപ്പുരയ്ക്കൽ സുബിൻ ഫ്രാൻസിസ് (35) ആണ് മരിച്ചത്. വെള്ളിയാഴ്ച വൈകിട്ട് ഏഴോടെ സുവർണഗിരി ഭജനമഠം ഭാഗത്തായിരുന്നു സംഭവം.
ഗർഭിണിയായ ഭാര്യയെ കാണാനായാണ് സുബിൻ ഭാര്യവീട്ടിൽ എത്തിയത്. ഇതിനിടെ അയൽവാസിയായ ബാബുവുമായി വാക്കുതർക്കം ഉണ്ടാകുകയും ഇയാൾ കോടാലികൊണ്ട് വെട്ടുകയുമായിരുന്നെന്നാണ് പൊലീസ് പറയുന്നത്. ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
സംഭവത്തിൽ സുവർണഗിരി വെൺമാന്തറ ബാബുവിനെ (58) പൊലീസ് കസ്റ്റഡിയിലെടുത്തു. ആക്രമണത്തിനുശേഷം വീടിനുള്ളിൽ ഒളിച്ച ബാബുവിനെ പിടികൂടാൻ എത്തിയ പൊലീസിനെയും ഇയാൾ ആക്രമിച്ചു. കീഴ്പ്പെടുത്താൻ ശ്രമിക്കവെ എസ്ഐ ഉദയകുമാറിന്റെ കൈക്ക് പരുക്കേറ്റു. ബാബു ലഹരിക്ക് അടിമയാണെന്നാണ് വിവരം. മരിച്ച സുബിന്റെ ഭാര്യ: ലിബിയ. മകൾ: എസ്സ.
